Stepanov Viktor Nikolajevič

<table class="infobox infobox- " style="" data-name="Valdmez'" itemscope itemtype="http://schema.org/Person">Viktor Nikolajevič Stepanov

Viktor Nikolajevič Stepanov (ven.: Ви́ктор Никола́евич Степа́нов, ) — om sovetskii da venälaine valdmez' da politikmez'.

Karjalan pämez' (1989—1998). Karjalan ezitai Venäman Parlamentas (1993—1998, 2001—2006). Karjalan Parlamentan IV—VI kucundoiden deputat (2006—2021).

Elostarin

Om sündunu 27. vilukud vodel 1947 Vidlica-küläs Oloncan rajonas Karjalaiž-Suomalaižes SSRas. Rahvahuden mödhe om karjalaine.

Openduz da rad

Lopi Karjalan valdkundaližen pedagogižen institutan vodel 1975, Piterin Ülembaižen partijan školan vodel 1980, Čehoslovakian kommunistižen partijan päkomitetan Ülembaižen partiiškolan aspiranturan Pragas vodel 1987. Om filosofijan tedokandidat.

Vodelpäi 1964 vodehesai 1968 — Vidlican Il'jinskan meczavodan pusep'. Vodelpäi 1968 oli sädaierišton ohjandajan, vodelpäi 1970 vodehesai 1973 — toine, sidä jäl'ghe ezmäine Oloncan RK VLKSM-organizacijan sekretar'. Vodelpäi 1973 — nevonik, vodelpäi 1974 — erišton ohjandai, vodelpäi 1976 — VLKSMan Karjalan obkoman toine sekretar'.

Partijan karjer

Vodelpäi 1980 — Kommunistižen partijan Karjalan obkoman nevonik. Vodelpäi 1980 vodehesai 1982 — Oloncan Kommunistižen partijan komitetan toine sekretar', vodelpäi 1982 vodehesai 1984 — Karjalan ASSRan KPSSan Präžan rajonan komitetan ezmäine sekretar'. Vodel 1987 om pandud KPSSan Karjalan obkoman erišton ohjandajask.

Vodelpäi 1988 radoi KPSSan päkomitetan apparatas rahvahidenkeskeižiden kožmusiden erišton nevonikan, ohjanzi pohjoižtahoid, sen lugus Čukotka da Evenkii.

Karjalan pämez' (1989—1998)

Tal'vkus vodel 1989 Karjalan ASSRan Ülembaižen nevondišton XI kucundan vižtoštkümnendel ližasesijal oli valitud Karjalan ASSRan Ülembaižen nevondišton Prezidiuman pämehen. Keväz'kus vodel 1990 oli valitud Karjalan ASSRan Ülembaižen nevondišton XII kucundan deputataks, a sulakus — sen ohjandajaks.

RSFSRan Zakonkogomusehe mülütadud vajehtusiden taguiči Karjalan nimi vajehtihe kahtišti: ezmäi oli "Karjalan SSR" (24. semendkud vodel 1991), a sidä jäl'ghe "Karjalan Valdkund (Karjala)" (21. sulakud vodel 1992).

Ühtni RSFSRan rahvahaližiden deputatoiden valičisihe, miččed oliba 4. keväz'kud vodel 1990 da oli valitud rahvahaližeks deputataks.

Vozil 1990—1993 — Venäman rahvahaline deputat, oli Rahvahiden nevondišton laudkundan rahvahuz'valdkundaližen sädamižen da rahvahidenkeskeižiden kožmusiden mödhe ühtnikan, ohjanzi deputatoiden "Suverenitet da ravenstvo"-joukud, oli "Venäman kommunistad"-frakcijan ühtnikan.

Sügüz'kus vodel 1990 om valitud udes tetud RSFSRan Kommunistižen partijan päkomitetan politbüron ühtnikakas.

Voden 1991 elokun 19-21. päividen azjtegoiden aigan, kacmata joukmitingoihe, miččed oliba Petroskoiš, da Petroskoin lidnalaižen nevondišton aktivižehe antiputčistskaha mel'pidoho, valdkundaline valdmehišt hätken puččihe antta sel'genzoitusid azjtegoihe sikš, miše ei olend todesižid tedoid Moskvan azjtegoiš. Oficialine käsk, mitte sudi GKČP-laudkundan tegoid, oli vahvištoitud vaiše jäl'ghe tedotust valdankumardusen murenduses, miččes tedotihe venälaižen parlamentan sessijal.

22. sügüz'kud vodel 1993 Karjalan Ülembaine nevondišt XII kucundad tugezi Venäman rahvahaližiden deputatoiden suiman pätusen da vahvištoiti, miše prezidentan Jel'cinan tegoil oli zakonkogomusetoi znamoičend, da sidä jäl'ghe tedoti hänen käskon vägetomaks Karjalas. 30. sügüz'kud Stepanov ajoi Moskvaha, kus ühtneda federacijan subjektoiden ühtnikoiden keradusel, miše pagištoitta küzundoiš krizisas lähtendaspäi. Parlamentan pätand sai suren vastustuen käskvaldmehišton ezitajiden polespäi, ezmäi kaiked Ministroiden nevondišton pämehen Sergei Blinnikovan da Petroskoin pämehen Sergei Katanandovan — premjer gräzi mureta kožmusid Ülembaižen Nevondištonke, ku se ei vajehta ičeze mel'pidod. Rida valdmehišton erištoiden keskes lopihe mitingoita da ocastusita, konz lopihe krizis pälidnas.

Jäl'ghe sidä, kut oli pästtud Venäman rahvahaližiden deputatoiden suim redukus vodel 1993, Stepanov kadoti rahvahan deputatan statusad. No 12. takl'vkud vodel 1993 ühtni uden valičusihe.

Ühtes Sergei Blinnikovanke Stepanov oli valitud Venäman Parlamentaha ezmäižen kucundad Karjalan ümbruzkundaspäi (№ 10).

17. sulakud vodel 1994, oli üks'jäine kandidat (Blinnikov heiti ičeze kandidaturad valičusilpäi), kudambad valičiba Karjalan valdmehišton pämeheks (Valdkundan pämehen radsija) 68,6 % änil.

Vodelpäi 1994 Karjala tegihe Barenceva/Jevroarktižen regionan ühthižtön aktivižeks ühtnikaks, vodel 1995 ühtni ühthižtöhö pol'tme. Surembad rahvahidenkeskeižed projektad Stepanovan valdoičendan aigan oma "Atlantika-Karjala" da "Arhangel'skan koridor" kehitoituzprojektad.

Vilukuspäi vodelpäi 1996 radsijan mödhe mülüi toižen kucundan Venäman Parlamentaha, oli Ripmatomiden valdkundoiden ühtištusen komitetan varapämehen.

Oldes gubernatoran radsijal, Stepanov oli Karjalan kommunistoiden ühtištuz-partijan (SKK, kaikid suremb valdkindaližen partiistruktur sil aigal, vodelpäi 1997 toižetihe KPRF-partijaha) ütnikan, no varaitei ridad Kremlinke, ei tugedand ühtižtöd sijaližiden kommunistoidenke da eskai abuti ven.: "Наш дом - Россия"-partijan kehitoitust valdkundas.

Vodel 1997 Stepanovan valdmehišt sai negativišt arvostelendad, sidä jäl'ghe kut Segežan CBK-kombinatan uz' ižand, Švecian AssiDoman-koncern, valdkundaližen valdmehišton paginan velgmaksmižiš l'gotoiš Pensionnijale fondale da b'udžetale aigan azoti tegendan kombinatal, a pigai, konz ei voin ladidas valdmehištonke, läksi kombinatalpäi da jäti radišton jügedoiš oloiš.

Valičusil kevädel vodel 1998 "Karjala"-sirdändanke, KPRF-partijan da Venäman rahvaz-valdkundaližen partijan ühtištuses ühtni voibištelendaha valdkundan pämehen radsijas Petroskoin pämehenke Sergei Katanandovanke, kudamb oli tugedud "Meiden pert' — Venäma" da LDPR-partijoiden abul. Stepanov pästi händast edehe ezmäižes (sai 34 %), muga i toižes (43,16 %) turoiš Voimuz' ridelta sudas valičusiden satusiš ei sand hänele ozad.

Senator da deputat

Voden 1998 tal'vkuspäi voden 2001 tal'vkuhusai — Käskiikomitetan azjoiden ohjanduzkundan pämez'. Tal'vkus vodel 2001 om pandud Venäman Parlamentan ezinikaks Karjalan valdmehištospäi voden 2002 semendkuhusai, jäl'geližiden Karjalan pämehen valičusid jäl'ghe händast udes vahištoitihe necile radsijale. Vodel 2006 Venäman Parlamentan ühtnikan valdoiktuded oma heittud.

Vodel 2006, Karjalan Parlamentan nelländen kucundan valičusil, Sergei Mironovan hökkähtusen mödhe, kudamban nevonikan hän oli, ohjanzi Venäman Elon partijan valdkundaližen lugetišen, mitte hänen personan taguiči, sai toižen sijan äniden mödhe. Nelländen kucundan Parlamentas Stepanov ohjanzi uden ven.: "Справедливая Россия — ЖИЗНЬ"-frakcijan. Oficialižen ühtnendan partijaha vahvištoiti sulakus vodel 2008. Vozil 2011 da 2016 oli udes valitud Spravedlivaja Rossia-partijan regionaližen lugetišen päsijal. Karjalan Parlamentan deputatan valdoiktuded lopihe sügüz'kus vodel 2021, valičusil VII kucundad hän ei ühtnend.

Kundaline rad

Eläb Moskvas, no ei erigoičend kožmusid Karjalanke. Om Valaaman monastirin abunevondišton ühtnik. Vodel 2022 Jemel'janovan sarel om avaitud jumalanpert', miččen sauvotusen vodelpäi 2012 ohjanzi Stepanov.

Ühtes monastirin vellidenke da külän eläjidenke udišti jumalanpertin Vidlica-küläs.

Arvnimed da pauklahjad

• Karjalan küläelomišton arvostadud radnik;
• Arvostusen orden;
• Radon veteran-medal';
• Medal' "Arvtegoiš Karjalan Valdkundan edes" (8. kezakud vodel 2020) — arvtegoiš Karjalan da sen eläjiden edes, sures panendas valdkundan social'no-ekonomižehe kehitoitusehe da aktivižes rados Karjalan tegemižen 100-voččen jubilejan praznuičendan vaumičendan Valdkundaližen laudkundan joukus;
• Olonec-lidnan arvostadud eläi (1998);
• (4. kezakud vodel 2014).

Kanz

Om leskiuk. Oma tütär da vunuk.

Mel'dub šahmatoihe, navedib lugeda. Moskvas kävub pälidnan kaikiš vanhembaha Roždestva Pühä Bogorodican-jumalanpertihe, mitte om tehtud vodel 1370.

Literatur

• Народные избранники Карелии: Депутаты высших представительных органов власти СССР, РСФСР, РФ от Карелии и высших представительных органов власти Карелии, 1923—2006: справочник. — Петрозаводск, 2006. — 320 с.