Teplickii Leopol'd Jakovlevič

<table class="infobox infobox- " style="" data-name="Музыкант" itemscope itemtype="http://schema.org/Person">Leopol'd Jakovlevič Teplickii

Leopol'd Jakovlevič Teplickii (ven.: Леопо́льд Я́ковлевич Тепли́цкий, ) om sovetskii dirižor da kompozitor, Karjalaiž-Suomalaižen SSRan arvostadud artist (1951), Karjalan ASSRan arvostadud taidehradnik (1962).

Elostarin

Om sündunu Smela-lidnas (nügüd' Ukrainan Čerkasskan agj). Muzikmahtod avaiži muite, sidä jäl'ghe päzui opendamhas muzikopištoho Jekaterinoslaviš (nügüd' Dnepr). Sikš ku oliba rahajügedused päliči koumes vodes jäti opendusen da ajoi Sinferopol'he, kus radoi akkomponiatoran kargaiduzklassoiš da restoranoiš. Vodel 1908 oli türmatud Jaltas peitoližen literaturan levenzoitusen täht, läz vot oli türmas.

Vodel 1914 lopi muzikopišton Har'kovas. Vodel 1915 päzui opendamhas Petrogradan konservatorijaha. Lopi fortepianon klassan kursan (Professor N. A. Sokolov), no käziden kibun täht sirdihe teorijan da kompozicijan tedokundale (Professoran V. P. Kalafati klass). Üläopenikan aigan radoi tap'oran L'uks-, Grand- da Molnija-kinoteatroiš, völ oli dirižoran Sevzapkino-sistemas.

Vodel 1926 oli oficiališti oigetud radmatkaha Amerikaha (Nju-Jork da Filadel'fii), miše oppida änetoman kinon muzikad da džazad. Voden radoi "džazan kunigahan" orkestras, tegihe harvaks sovetskijaks muzikantaks, kudamb oppi originališt amerikan džazad.

Pörttes Piterihe aranžirovkoiden da plastinkoiden kogomusenke, 28. sulakud vodel 1927 sädi "Ezmäižen džaz-bend"-koncertan Akademižes kapellas. Teplickijan orkestr, miččes sidä aigan zavodi ičeze karjerad , sai surt tetabut Sovetskijas Sojuzas, ezitades Dž. Geršvinan, Dž. Kernan da I. Berlinan pjesoid.

Repressijad

6. redukud vodel 1930 oli väritadud špionažiš da türmatud (st. 58-6 KK RSFSR). Sudindan sü oli rad Amerikas. Sudan pätusen mödhe oli sudidud koumeks vodeks konclagirihe. Mäneti türmaigad Belomoro-Baltižen vezikanalan sauvondal. Medvežjegorskas, mitte ende oli vezikanalan sauvondan keskuz, Teplickii türmatud mehiden keskes sädi simfonižen da puhutuzorkestrad, miččed radoiba Belomoro-Baltižen vezikanalan teatras.

Om täuzin reabilitiruidud vodel 1989 (surman jäl'ghe).

Muštlaud Petroskoiš

Rad Karjalas

Semendkus vodel 1933 tuli Petroskoihe. Ohjanzi Karjalan radiokomitetan simfoništ orkestrad. 24. uhokud vodel 1934 sädi Petroskoiš ezmäižen džaz-orkestran koncertan.

Vodelpäi 1935 openzi Petroskoin muzikopištos teorijad, partituroiden lugemišt da instrumentovkad. Hänen openikoiden keskes oma tetabad karjalaižed kul'turan radnikad: G. N. Sinisalo, V. P. Gudkov, А. A. Antišev.

Hänel om pärol' "Kantele"-ansamblin tegemižes. Ühtes V. P. Gudkovanke hän tegi karjalaižen da suomalaižen fol'kloran muziktegemižed. Hänen radod — ven.: "Карельская прелюдия", ven.: "Сюита на карельские темы", ven.: "Три финских танца" oma ansambl'an kuldaižes fondas. Vozil 1945—1948 da 1955—1958 oli "Kantele"-ansambl'an pädirižoran.

Suren Kodiman voinan aigan oli evakuacijas Frunze-lidnas (Kirgizijan SSR), kus aktivišti ühtni lidnan kul'tureloho.

Koli 16. kül'mkud vodel 1965 Petroskoiš.

Pauklahjad da arvnimed

• "Arvostusen znam" orden (1959);
• "Radon sattusiš" medal' (1951);
• KFSSRan da KASSRan Ülembaižen Nevondišton prezidiuman kitändkirjeižed;
• Karjalaiž-Suomalaižen SSRan arvostadud artist (1951);
• Karjalan ASSRan arvostadud taidehradnik (1962).

Mušt

• Vodelpäi 2002 jogavoččen džazmuzikan ven.: "Звёзды и мы"-festival' Petroskoiš om Leopol'd Teplickijan nimel.
• Vodel 2004 Petroskoiš Leninan prospektan pertin № 1 seinäle om pandud muštlaud (vestai Aleksandr Akulov).

Literatur

• Карелия: энциклопедия: в 3 т. / гл. ред. А. Ф. Титов. Т. 3: Р — Я. — Петрозаводск: ИД «ПетроПресс», 2011. — P. 167—384. — .

Lähtked

• Е. В. Шарахаева. Леопольд Яковлевич Теплицкий (к 120-летию со дня рождения)
• Теплицкий Леопольд Яковлевич
• Национальный архив Республики Карелия