Lavrov Sergei Viktorovič

<table class="infobox infobox- " style="" data-name="Valdmez'" itemscope itemtype="http://schema.org/Person">Sergei Viktorovič Lavrov

Sergei Viktorovič Lavrov (ven.: Сергей Викторович Лавров; ) - Venäman politik, diplomat. Venäman verhiden azjoiden ministr 9. keväz'kuspäi vodelpäi 2004 (aigsijaline pämez' 7.—12. semendkud vodel 2004, 8.—12. semendkud vodel 2008, 8.—21. semendkud vodel 2012, 8.—18. semendkud vodel 2018, 15.—21. vilukud vodel 2020, 7.—13. semendkud vodel 2024). Üksjaine nügüdläine venälaine ministr, kudamb radab ühtel sijal enamba 20 vot.

Venäman Varumatomuden Nevondišton kaikenaigaine ühtnik. Venäman da Sovetskijan Sojuzan eriline da täuz'valdaine posol. Venäman diplomatižen služban arvostadud radnik (2004). "Kodiman hüväs rados"-ordenan täuz' kavaler (2020). Venäman Radon Geroi (2020). Pühän apostolan Andrei Pervozvannijan ordenan kavaler Кавалер (2025).

Redukus 2014 Lavrov sanui Sovetskijan Sojuzan verhiden azjoiden ministran polhe kut "sovetskijan aigkeskustan sur'znamasižes diplomatas"; necidä rindatust Gromikonke hän arvosti kut sur' arv ičeze täht.

Elostarin

Lavrovan tatan polhe om tedoid, miše hän om Tbilisian armenialaine, toižiden tedoiden mödhe — Kalantarov libo Kalantar'an familijanke. Maman polhe om tedoid, miše hän oli Sovetskijan Sojuzan irdmöndan ministerstvan radnik. Venäman verhiden azjoiden ministerstvan saital om kirjutadud, miše Lavrov — venälaine.

Openduz

Sergei Lavrov openzihe školas № 2 V. Korolenkon nimel Noginsk-lidnas Moskvan agjas, sid' läksi opendamhas moskvalaižehe školha № 607, kus openzi süväs anglijan kel't, lopi školan hobedaižen medalinke. Hänen armhan urokan oli fizik. Vodel 1972 lopi Moskvan valdkundaližen rahvahidenkeskeižiden kosketusiden institutan (MGIMO) - Sovetskijan Sojuzan Verhiden azjoiden ministerstvan päivnouzmanpolen erišton.

Lavrov pagižeb anglijan, signal'skan da francijan kelil.

Rad Verhiden azjoiden ministerstvas

1972—1994

Vozil 1972-1976 Lavrov služi openikan, Sovetskijan Sojuzan posol'stvan attašen Šri-Lankan Valdkundas, vozil 1976-1981 oli koumanden da toižen sekretarin Sovetskijan Sojuzan Verhiden azjoiden ministerstvan rahvahidenkeskeižiden ekonomižiden organizacijoiden erištos. Vozil 1981-1988 — ezmäine sekretar', nevonik, vanhemb nevonik, Sovetskijan Sojuzan kaikenaigaine azitai Ühtenzoittud rahvahiden organizacijas Nju-Jorkas. Vozil 1988-1992 — Sovetskijan Sojuzan Verhiden azjoiden ministerstvan Rahvahidenkeskeižiden ekonomižiden organizacijoiden ohjandusen varapämez', ezmäine varapämez', pämez'. Oli Sovetskijan Sojuzan kommunistižen partijan (KPSS) ühtnik vodhesai 1991.

Vozil 1991-1992 — Sovetskijan Sojuzan Verhiden azjoiden ministerstvan Rahvahidenkeskeižiden ekonomižiden organizacijoiden ohjandusen pämez'. Vodel 1992 tegihe Venäman verhiden azjoiden ministerstvan Rahvahidenkeskeižiden organizacijoiden da sur'znamasižiden problemoiden departamentan pämeheks.

3. sulakud vodel 1992 Lavrov om pandud varapämeheks. Ohjanzi Venäman verhiden azjoiden ministerstvan Rahvahidenkeskeižiden organizacijoiden da rahvahidenkeskeižen ekonomižen ühthižradon departamentan, Ristitun oiktusiden da rahvahidenkeskeižen kul'turühthižradon ohjandusen departamentan da SNGn valdkundoiden azjoiden departamentan radod. Oli necil radsijal vilukuhusai vodhesai 1994. Keväz'kuspäi vodelpäi 1993 — Erištoidenkeskeižen laudkundan varapämez' Venäman ühtendan mödhe Ühtenzoittud rahvahiden organizacijan sisteman rahvahidenkeskeižiš organizacijoiš. Kül'mkuspäi vodelpäi 1993 — Erištoidenkeskeižen laudkundan üks' pämehišpäi Venäman ühtendan mödhe aburados.

Venäman kaikenaigaine ezitai
Ühtenzoittud rahvahiden organizacijas

Vozil 1994-2004 Lavrov — Venäman kaikenaigaine ezitai Ühtenzoittud rahvahiden organizacijas da Ühtenzoittud rahvahiden organizacijan Varumatomuden Nevondištos.

Venäman Verhiden azjoiden ministr

Voz' 2004

9. keväz'kud vodel 2004 Venäman prezidentan käskön mödhe Lavrov om pandud Venäman Verhiden azjoiden ministran sijale. Semendkus vodel 2004 konz Venäman [prezident oli möst valitud da pandud ičeze sijale udeks aigkeskustaks, Lavrov möst oli pandud ičeze ministran sijale. Oli udeks pandud necile sijale semendkus vodel 2008 konz prezidentan sijale tuli Dmitrii Medvedev. 21. semendkud vodel 2012 möst tegihe ministraks, konz prezidentan sijale tuli Vladimir Putin. 18. semendkud vodel 2018 oli vahvištadud Venäman valdmehišton uz' lugetiž, kus Lavrov kaiči ministran sijad. Jäl'ghe valdmehišton heitändad vilukus vodel 2020 om pandud möst Verhiden azjoiden ministraks Mihail Mišustinan udes radhonuses. 14. semendkud vodel 2024 möst tegihe Venäman Verhiden azjoiden ministraks.

Venäman laudkundan pämez' JUNESKOn azjoiden mödhe (sulakuspäi vodelpäi 2004).

11. vilukuspäi vodelpäi 2010 — valdmehišton laudkundan ühtnik ekonomižen kehitoitusen da integracijan mödhe.

Küzelusiden mödhe, miččed tegi Venäman rahvahan mel'pidoiden oppindkeskuz, Lavrov äi kerdoid mühüi koumehe parahimaha Venäman ministroiden luguhu. "Medialogija"-kompanijan tedoiden mödhe Lavrov äi kerdoid tegihe reitingan lideraks Venäman lehtesiš, kus johtutadas ministroid.

• 
  Sergei Lavrov Venäman Varumatomuden Nevondišton ištundal. Voz' 2013 
• 
  Sergei Lavrov, Vladimir Putin da Tatoi Rimskii Francisk. 10. kezakud vodel 2015 
• 
  Sergei Lavrov da Donal'd Tramp. 10. semendkud vodel 2017 
• 
  Sergei Lavrov ühtes Venäman Polestuzministranke Tokios. Voz' 2017 

Vodel 2016 Sergei Lavrovan radon 12 vodes päliči Gazeta.ru kirjuti hänes kut "impozantnijas intellektualas", kudamb ühtes Sergei Šoigunke om üks' kaikiš popul'arižembiš ministroišpäi Venämal.

Vodel 2021 Lavrov ühtni valičendoihe Valdkundližehe Dumaha kut "Jedinaja Rossia"-lugetišen federaližen palan lider. Jäl'ghe valičendoid 29. sügüz'kud vodel 2021 Lavrov hül'gäiži mandataspäi (ühtes partijan lugetišen toižiden lideroidenke).

Lavrov Venäman Varumatomuden Nevondišton ištundal Doneckan da Luganskan rahvahaližiden valdkundoiden ripmatomuden vahvištoitusen mödhe (21. uhokud vodel 2022)

Diplomatii vointegoiden aigan Ukrainal vodelpäi 2022

Konz zavodihe vointegod Ukrainal verhad mad tahtoiba ajada Lavrovad rahvahidenkeskeižiden forumoiden ühtendaspäi, kuna händast tariž kucta statusan mödhe. Muga tal'vkus vodel 2022 Pol'ša hül'gäiži Lavrovale ühtneda verhiden azjoiden ministroiden jogavoččehe vastusehe отказала Лаврову Lodziš.

Heinkus vodel 2022 Lavrov daAmerikan valdkundaline sekretar' Entoni Blinken pidiba lühüdad paginad Indonezijas Verhiden azjoiden ministoriden G20-vastusel, sid' pagižiba telefonadme tür'mha pandud mehiden polhe. Jäl'ghe necidä paginad 8. tal'vkud suditud Venämal narkotikoiden kontrabandas amerikalaine neižne Brittni Grainer oli vajehtadud suditud Amerikas venälaižeks biznesmeheks Viktor Butaks. 31. vilukud vodel 2023 Lavrov sai Blinkenalpäi kirjeižen Ukrainan mödhe, hän oigenzi sidä Jegiptan Verhiden azjoiden ministran kal't, kus Blinken kirjuti siš, miše pidab "azotada uded anneksijad". Keväz'kus Lavrov da Blinken ühtniba Verhiden azjoiden ministroiden nevondištoho, no ei pagižnugoi toine toiženke. Kül'mkus vodel 2023 Blinken äkkid läksi vastuselpäi, miččel kerazihe irdpolitižiden erištoiden pämehed Skopjes edel Lavrovan tulendad. Hüväd, täuz'valdažt paginad Lavrovan da Blinkenan keskes jäl'ghe Eriližen operacijan augotišt Ukrainal ei olend.

30. kül'mkud-1. tal'vkud vodel 2023 Lavrov ühtni vastusehe ezmäižen kerdan jäl'ghe sidä, konz zavodihe eriline operacii Ukrainal, vastuz' mäni Pohjoiž-Makedonijas. Lavrovan taguiči Pol'ša da Baltian valdkundad ei tulnuded forumale. Lavrov sanui vastusel kaiken tehtud degradacijas OBSEs varumatomuden koumen polen mödhe. Lavrov sanui destruktivižes tendencijas: Päivlaskmanpolen valdkundad ei el'gendanugoi nimidä i murendaba organizacijad edemba. Lavrov pakiči, miše uz' ministroiden vastuz mäniži mal'tas, a ei Estonijas; miše paginoid Venäman heitändas OBSE-organizacijaspäi ei voi enamba olda.

Sulakus vodel 2024 Lavrov tegi kaks'päiväižed paginad Pekinas, vaumiči Putinan tulendad Kitajaha. Oli muretud mel'pido äipoližes mirus, Venäma da Kitai pagižiba sen polhe, miše konfliktan azotamine Ukrainal ei voi olda ilman Venäman diplomatoita.

Kezakus vodel 2024 Lavrov ajoi Afrikan valdkundoidme, konz oli Gvinejas, Kongos, Burkina-Fasos, Čadas da pagiži ühthižrados politik-ekonomižiden da voin-tehnižiden küzundoiden mödhe.

Teravad mel'pidod

Paginad jevrejoiš

Kacmata sihe, miše Lavrovan vävu om izrail'alaine, a heimolaižed eläba Izrail'as, verazmaižed lehtištod kijrutiba Lavrovan "antisemenizmas".

Muga, 1. semendkud vodel 2022 italialaižen Mediaset-telekompanijan küzundaha Vladimir Zelenskijan polhe da Ukrainan "nacifikacijas", Lavrov sanui: "Voin olda väran, no Adol'f Gitleral oli mugažo jevrealaine veri. Nece ei znamoiče nimidä. Melekaz jevrejan rahvaz pagižeb siš, miše kaikid aktivižembad antisemitad oma jevrejalaižed. "Kanzas hot' üks' värnik, no om", - sanuba venänikad".

Izrail'an Verhiden azjoiden ministr Jair Lapid tahtoi ozutada, miše Lavrovan paginoid "ei sa prostida, ned oma pahad da istorijan viga".Venäman Verhiden azjoiden ministrad sudiba toižed-ki politikad da organizacijad. Izrail'an premjer-ministr Naftali Bennett nimiti lavrovan sanoid "kelastuseks" da pakiči ei johtutada enamba Holokostad politikpaginoiš. Venäman Verhiden azjoiden ministerstv andoid vastust Izrail'an Verhiden azjoiden ministerstvale, miše jevrejalaižed ei surmitanugoi iče ičtaze Holokostan aigan i Ukrainan prezidentan jevrejalaižed jured ei voigoi vastustada neonacizmale, kut Latvijan prezidental Egils Levitsal. 4. semendkud Venäman päravvin Berl Lazar pakiči ministrad pidäda prostindad sanoiš, miše "jevrejalaižed oma kaikid aktivižembad antisemitad". 5. semendkud Izrail'an premjer-ministran press-služb sanui Putinan prostindas Lavrovan sanoiš.

18. vilukud press-konferencijal vodes 2022 Lavrov sudi Amerikad da Jevropad pätta venälašt küzundad da rindati sidä jevrejalaižen küzundanke, mittušt Gitler tahtoi pätta. Startegižiden kommunikacijoiden ohjandai Vauktan pertin Rahvahaližen varumatomuden nevondištos Džon Kihbi nimiti venälaižen ministran vaihid meletomikš da pahoikš. Jevropan kongress lugi niid kut kelastuz da kucui pakita prostindad, no lavrov hül'gäiži.

Toižed radsijad da holed

• Imperatoran ortodoksižen palestinan sebran arvostadud ühtnik.
• "Venälaine mir"-fondan abunevondišton ühtnik.
• "Venäman lapsed"-fondan kacundnevondišton ühtnik.
• Andrei Pervozvannijan fondan "Venälaižiden soldatoiden muštpachan udessündutamine Gallipoliš (Gelibolu)"-programman abunevondišton ühtnik.
• Donan valdkundaližen tehnižen universitetan arvostadud tedodoktor.
• Venä-tadžikialaižen (slavilaižen) universitetan arvostadud tedodoktor.
• Kirgizii-venälaižen slavilaižen universitetan Boris Jel'cinan nimel arvostadud tedodoktor.
• Belorussian valdkundaližen universitetan arvostadud tedodoktor.
• Moskvan valdkundaližen rahvahidenkeskeižiden kosketusiden universitetan abunevondišton (endaument-fond om heittud sulakus vodel 2022) da kacundnevondišton pämez'.
• Venäman federacijan soudandslaloman abunevondišton pämez'.
• "Amerik da Kanada: ekonomik, politik, kul'tur"-kulehtesen toimitajiden kollegijan ühtnik.

Ližatedod

Sergei Lavrov Venäman äkkiližen da täuz'valdaližen poslan sädoiš

• Lavrov om irdpolitižen erišton viden pämehen keskes, kudamb pidemba kaikid enččid radnikoid valdkundan istorijas om necil sijal (Karl Nessel'rode — 39 vot, Andrei Gromiko — 28 vot, Aleksandr Gorčakov — 26 vot, Nikita Panin — 17,5 vot).
• "Kommersant"-lehtesen tedoiden mödhe Lavrovan kirjutusel armenialaižele ühtesradnikale edvard Nalband'anale oli pärol' Armenia-turkalaižiden hüviden kosketusiden da ühthižradon allekirjutamižes 10. redukud vodel 2009 C'urihas.
• Sulakus vodel 2011, konz Lavrov pidi paginad Äipäiväl, hän sanui, miše Mail'man raha-ekonomine krizis lujas vahvas ozuti, miše voib lähtta kehitoituzmatkaha liberaližen kapitalizman tugel, hänen melen mödhe, se "tugedab kacta uzil sil'mil mugoižen moralin päle, kut ičeröunatuz da vastusenpidänd".

Sankcijad

Vodelpäi 2022 vointegoiden taguiči Ukrainal Lavrov om pandud Amerikan, Jevrosojuzan, Velikobritanian, Kanadan, Avstralian, Japonian da toižiden valdkundoiden sankcijoiden lugetišehe.

Kanz

Ak — Maria Aleksandrovna Lavrova, opendusen mödhe filolog, venän kelen da literaturan opendai, radoi Ühtenzoittud rahvahiden organizacijan Venäman kaikenaigaižen ezitusen kirjištos.

Tütär — Jekaterina Sergejevna Vinokurova, om sündunu vodel 1982 Nju-Jorkas, openzihe Manhettenan školas, lopi Kolumbian universitetad, kus openzi politologijad, da magistraturad Londonan ekonomikan mödhe; nügüd' eläb Moskvas, om britanialaižen aukcionnijan angl.: "Christie’s"-pertin venälaižen erišton pämez' (antikvariatan da taidehtehmusiden mönd). Oldes praktikal Londonas jäl'ghe universitetad, tundištoitihe da vodel 2008 läksi mehele Aleksandr Vinokurovan — "TPG Capital", "Morgan Stanley", ven.: "Суммы" da ven.: "Альфа-групп" top-menedžeran taga, vodelpäi 2017 — ven.: "Марафон групп" investicionnijan kompanijan da toižiden aktivoiden pidäi.

Vonuk — Leonid (sünd. 2010) da vunukaine. Vodel 2015 Lavrov sanui, miše hänen kanz eläb Venämal.

Hobbi da melentartused

Lavrov navedib runoid da iče kirjutab niid. Hän om gimnan avtor. Navedib pajatada, konz vätas gitaral.

Edel Venäman da Turcijan ülembaižen pordhaižen ühthižradon nevondišton ištundad, 8. sulakud vodel 2019

Hobbi — . Lavrov oli Venäman federacijan soudandslaloman üks' ezmäižišpäi tegijoišpäi da pämehišpäi (2006—2009).

Lavrov navedib väta jaugmäčhu, hänen armaz jouk om "Spartak" (Moskva). Hänen sanoiden mödhe, muštatišed armhas joukos abutaba hänele kaita pidäda ičtaze käziš jügedoiden paginoiden aigan. Keväz'kus vodel 2016 hän oli Venäman Rahvahaližen jäugmäčun ligan tegijoišpäi, miše ühtenzoitta necen sportladun navedijoid Venäman kaikiš čogaižišpäi.

Lavrov — kaikenaigaine pipkutai. Dublinan restoranas, Irlandijan pälidnas, hänele tahtoitihe antta štrafad 3000 evrod pipkutandas, no ministr hül'gäiži maksta da starinoiči neciš azjas press-konferencijal. Om tetab üks' starin, konz Lavrov vastusti Ühtenzoittud rahvahiden organizacijan päsekretarin Kofi Annanan pätandale kel'dä pipkutada organizacijan štab-fateras: ministr sanui, miše hän ei voi kel'dä necidä, sikš ku Annan ei ole fateran ižand. Lavrov sel'genzoiti: "Nece om Ühtenzoittud rahvahiden organizacijan kaikiden ühtnikoiden fater, i sen päsekretar' om vaiše sen ohjandai".

Pauklahjad da premijad

Venäman prezident Vladimir Putin da Sergei Lavrov "Kodiman hüväs rados" I stepenin ordenan pauklahjoičemižel 21. semendkud vodel 2015

Venäman prezident Dmitrii Medvedev da Sergei Lavrov "Kodiman hüväs rados" II stepenin ordenan pauklahjoičemižel 12. heinkud vodel 2010

• Venäman Radon Geroi (17. keväz'kud vodel 2020) — eriližes rados valdkundan da rahvahan hüvüdeks.
• Pühän apostolan Andrei Pervozvannijan orden (21. keväz'kud vodel 2025) — arvokahas rados Kodiman hüvüdeks, sures panendas Venäman irgpolitižen kursan tegemižehe da pästandaha, äivoččes hüväs valdkundaližes rados.

"Kodiman hüväs rados"-ordenan täuz' kavaler

• "Kodiman hüväs rados" I stepenin orden (21. keväz'kud vodel 2015) — arvokahas rados Venäman irgpolitižen kursan tegemižes da äivoččes diplomatižes rados.
• "Kodiman hüväs rados" II stepenin orden (voz' 2010).
• "Kodiman hüväs rados" III stepenin orden (21. keväz'kud vodel 2005) — arvokahas rados Venäman irgpolitižen kursan tegemižes da äivoččes hüväs rados.
• "Kodiman hüväs rados" IV stepenin orden (12. semendkud vodel 1998) — sures panendas Venäman irgpolitižen kursan tegemižehe da äivoččes hüväs rados.

Lavroval oma mugažo pauklahjad:

• Arvostusen orden (21. kezakud vodel 1996) — rados valdkundan hühüdeks, sures panendas Venäman irdpolitižen kursan tegemižehe da rahvahaližiden melentartusiden kaičemižehe, rohktudes da ičezeandmižes radon tegemižes.
• I stepenin medal' "panendas Jevraziiskijan ekonomižen ühtištusen tegemižehe" (13. semendkud vodel 2015, Jevraziiskijan ekonomižen ühtištusen Ülembaine nevondišt).
• P. A. Stolipinan II stepenin medal' (20. keväz'kud vodel 2020) — sures rados Venäman irdpolitižen kursan pästamižes da äivoččes hüväs rados.

Venäman Prezidentan pauklahjad

• Venäman Prezidentan arvkirjeine (8. keväz'kud vodel 2010) — sures rados Venäman irdpolitižen kursan pästamižes da äivoččes hüväs rados.
• Venäman Prezidentan kitändkirjeine (4. kül'mkud vodel 2006) — hüväs vaumičendrados da valdkundoiden da valdmehištoiden pämehiden - "kahesan gruppan" ühtnikoiden vastusiden tegemižes Piter-lidnas.
• Venäman Prezidentan kitändkirjeine (27. sügüz'kud vodel 2005) — hüväs vaumičendrados da praznikaližiden azjtegoiden pidämižes, miččed om omištadud Suren kodiman 1941—1945 voziden voinan 60-voččele vägestusele.
• Venäman Prezidentan kitändkirjeine (20. keväz'kud vodel 2000) — äivoččes hüväs diplomatižes rados.
• Venäman Prezidentan kitändkirjeine (27. redukud vodel 1994) — ičeze sures panendas vastusiden vaumičendaha ülembaižel pordhaižel Korfu-sarel da Neapoles.

Regionaližed pauklahjad:

• Znam "Hüväs rados Moskvan agjas" (12. keväz'kud vodel 2010).
• "Pol'arižen Tähthaižen"-orden, (Jakutii, 12. kül'mkud vodel 2012).
• Orden "Hüväs rados Kaliningradan agjas" (27. semendkud vodel 2014) — Kaliningradan agjan eläjiden vizoiden režiman kebnemban samižen rados.

Verazmaižed pauklahjad:

• II stepenin "Dostik"-orden (Kazahstan, voz' 2005).
• Arvmedal' "Ühtenzoittud Rahvahiden organizacijan programmoiden ühtendas" (Ühtenzoittud Rahvahiden organizacijan Venälaine associacii, voz' 2005).
• Rahvahiden sebruden orden (Belorussii, 2. kezakud vodel 2006) — znamasižes panendas sebruden da ühthižradon vahvištoitusehe Belorussijan da Venäman keskes, Ühtištuzvaldkundan tegemižehe.
• Ripmatomiden Valdkundoiden Ühtištusen valdkundoiden-ühtnikoiden parlamentankeskeižen assamblejan "Sodružestvo"-orden (Ripmatomiden Valdkundoiden Ühtištusen parlamentankeskeine assamblei, 13. semendkud vodel 2007).
• Jerevanan valdkundaližen universitetan kuldaine medal' (Armenii, voz' 2007).
• "Perun Päiväižen"-ordenan Suren ristan kavaler (Peru, voz' 2007).
• Sebruden orden (Vjetnam, voz' 2009).
• Arvostusen orden (Suvi-Osetii, 19. keväz'kud vodel 2010) — ičeze sures panendas rahvahidenkeskeižen varumatomuden sisteman vahvištoitusehe, mirun tugemižehe da stabiližudehe Kavkazal, sebruden kehitoitusehe Suvi-Osetijan da Venäman keskes.
• Pühän Mesropan Maštocan orden (Armenii, 19. elokud vodel 2010) — sures panendas igäižen armenialaiž-venälaižen sebruden vahvištoitusehe da kehitoitusehe.
• I stepenin "Dostik"-orden (Kazahstan, voz' 2012).
• Sebruden orden (Laos).
• Serbian flagan I stepenin orden (Serbii, 12. tal'vkud vodel 2016) — eriližes rados Serbijan da Venäman kosketusiden kehitoituses da vahvištoituses.
• "Danaker"-orden (Kirgizii, 16. kezakud vodel 2017) — aktivižes kirgizan-venälaižiden social-ekonomižen ühthižrados da valdkundoidenkeskeižiden kosketusiden vahvištamižes.
• Serbijan Valdkundan orden (Serbii, Bosnia da Gercegovina, voz' 2018).
• Pühän Agatan ordenan Sur' rist (San-Marino, 21. keväz'kud vodel 2019).
• "25 vot Kazahstanan ripmatomudele"-jubileimedal' (Kazahstan, voz' 2019) — panendas kazahstan-venälaižiden kosketusiden kehitoitandaha da vahvištoitusehe.
• "Sebrastuz"-orden (Uzbekistan, 21. keväz'kud vodel 2020) — sures rados uzbeksko-venälaižen strategižen ühthižradon kehitoituses, sur'znamasižes panendas mönd-ekonomižiden, tedo-tehnižiden da kul'tur-gumanitarižiden kosketusiden levitoitusehe, kahten valdkundan regionoiden ühthižrados, sebruden vahvištoituses da meiden rahvahiden el'genzoituses, aktivižes tuges rahvahidenkeskeižel arenal, kus Uzbekistanan iniciativoil om tärged regionaline da mail'man znamoičend, ved' ned om oigetud mirun, progressan tegemižehe, mugažo 70-voččeks jubilejaks.
• I stepenin "Baris"-orden (Kazahstan, 21. keväz'kud vodel 2020) — sures panendas äipoližen ühthižradon da strategižen partn'orstvan kehitoitusehe Kazahstanan da Venäman keskes.
• Makariosan III ordenan Sur' rist (Kipr, 8. sügüz'kud vodel 2020).
• Federacijan orden (Ühtenzoittud Araban Emiratad, voz' 2021) — abus da kosketusiden vahvištoituses kahten valdkundan keskes da levitoitamižes kaikil politižil pordhaižil.
• Arvtegoiden ordenan komandor tähthaiženke (Vengrii, voz' 2021).
• Malin Rahvahaližen ordenan komandor (Mali, voz' 2023).
• I stepenin "Arvostuz da tetabuz'"-orden (Abhazii, voz' 2023).
• Žerebcan ordenan komandor (Burkina-Fason ülembaine valdkundaline pauklahj, voz' 2024).

Konfessionaližed pauklahjad:

• Pühän kn'az'an Daniil Moskovskijan II stepenin orden (Venälaine ortodoksine pühäpert').
• Pühän kn'az'an Daniil Moskovskijan I stepenin orden (Venälaine ortodoksine pühäpert', voz' 2010).
• Pühän Sergii Radonežskijan I stepenin orden (voz' 2015).
• Pühiden apostoloiden Petran da Pavlan I stepenin orden (Antiohijan ortodoksine pühäpert', 27. uhokud vodel 2015).
• Pühän suren kn'azin Aleksandr nevskijan I stepenin orden — panendas pühäpertin-valdkundaližiden kosketusiden kehitoitusehe (Venälaine ortodoksine pühäpert', 21. keväz'kud vodel 2025).

Arvnimed:

• Venäman diplomatižen služban arvostadud radnik (22. keväz'kud vodel 2004) — sures panendas Venäman irdpolitižen kursan tegemižehe da pästandaha.
• Managuan arvostadud ristit (Nikaragua).
• gvatemalan arvostadud ristit (voz' 2010).
• Moskvan agjan Noginskijan rajonan arvostadud ristit (voz' 2014).

Toižed pauklahjad:

• Kollektivižen varumatomuden kožmusen tegemižen Kollektivižen varumatomuden nevondišton arvkirjeine (20. tal'vkud vodel 2011) — aktivižes da sures rados voin-politižen kehitoitusen da süvenendan mödhe Kollektivižen varumatomuden kožmusen tegemižen aigan.
• Pühän kn'azin Aleksandr Nevskijan kundaline premii (Komitet Pühän kn'azin Aleksandr Nevskijan kundaline premijan andamižen mödhe, voz' 2014) — diplomatižes rados, mitte om oigetud Venäman rahvahidenkeskeižen sijan vahvištoitusehe.
• Sergei Mihalkovan kuldaine muštmedal' (22. tal'vkud vodel 2015, Venälaine kul'turfond).
• Rahvahaline "Imperijan kul'tur"-premii Eduard Volodinan nimel — Rados da službas Kodimal (voz' 2015).
• Venä-armenialaižen (slavilaižen) universitetan arvostadud orden.

Tarkendused

• Биография на сайте МИД России
• Информационный бюллетень МИД России
• Борец за права дипломатов и поэт
• Эксклюзивное интервью Сергея Лаврова «Вестям» (ноябрь 2009 года)
• David M. Herszenhorn, Michael R. Gordon Veteran Diplomat Fond of Cigars, Whiskey and Outfoxing U.S. // New York Times, 16 September 2013
• NYT: Соглашение по сирийскому химоружию подняло Лаврова на вершину карьеры // Взгляд.ру, 18.09.2013.
• Подробная биография и источники