Tatjana Golikova

<table class="infobox infobox- " style="" data-name="Valdmez'" itemscope itemtype="http://schema.org/Person">Tatjana Aleksejevna Golikova

Tatjana Aleksejevna Golikova (ven.: Татья́на Алексе́евна Го́ликова, ) — venälaine valdmez', ekonomist.

Venäman valdmehišton varapämez' socialižen politikan küzundoiden mödhe 18. semendkuspäi vodelpäi 2018 (pämehen radontegii 15. — 21. vilukud vodel 2020, 7. — 13. semendkud vodel 2024). Ohjandai Öbokan federaližes okrugas 19. heinkuspäi vodelpäi 2021. Venäman valdmehižton rahoiden universitetan valdkundaližen ohjandamižen da rahoiden takkištelusen tedokundan dekan.

21. vilukud vodel 2020 kaiči radsijan Mihail Mišustinan valdmehištos. ohjandab sociališt alovehed (valdkundališt politikad tervhude, opendusen, tedon, kul'turan da norišton politikan alovehes).

Venäman lugendpalatan pämez' (2013—2018). Venäman prezidentan abunik social-ekonomižen ühthižradon küzundoiden mödhe mugoižiden valdkundoidenke kut SNG (Ripmatomiden valdkundoiden ühtištuz), Abhazii da Suvi-Osetii (2012—2013). Venäman tervhuden da socialižen kehitoitusen ministr (2007—2012), Venäman rahoiden ezmäine varaministr, varaministr (2002—2007).

Venäman arvostadud ekonomist (2004). Ekonomikan tedodoktor (2008), professor (2017). II, III da IV stepenin ordenan kavaler "Kodiman hüväs rados" (2008, 2012, 2016). Venäman nügüdläine valdkundaline 1. klassan nevonik (2003).

Elostarin

Om sündunu 9. uhokud vodel 1966 Mitišči-sijas Aleksei Gennadjevič da L'ubov' Mihailovna Golikovoiden kanzas. Tat radoi zavodal, mam — tovarovedan.

Lopi keskškolan Lesnoi Gorodok — küläs Odincovan rajonas. Openduzvozil oli školan komsorgan.

Openduz

Vodel 1987 lopi ekonomižen tedokundan Moskvan rahvahaližen elomižton institutas G. V. Plehanovan nimel "Radon ekonomik" — special'nostin mödhe, "Ekonomist"-kvalifikacii.

Vodel 2005 polesti kandidatan dissertacijad "Venäman organizacijan-ekonomižen mehanizman ohjandamine effektivižen b'udžetkeskeižiden kosketusiden vajehtamižen pohjal" — teman mödhe, miččen vaumiči Piterin valdkundaližes inžener-ekonomižes universitetas ühtes ekonomikan tedodoktoranke, professoranke A. I. Mihailuškinanke

Vodel 2008 polesti dissertacijad da tegihe ekonomikan tedodoktoraks (tem: "b'udžetkeskeižiden kosketusiden ohjandamižen teorii da metodologii Venämal"), udes kirjutadud doktoranturas Piterin valdkundaližes inžener-ekonomižes universitetas.

Professionaline karjer

Valdkundaližen radkomitetan Tedo-tedišteluzinstitutas

Vodelpäi 1987 jäl'ghe institutan lopendad putui radole Sovetskijan Sojuzan Valdkundaližen radkomitetan Radon Tedo-tedišteluzinstitutha radmaksun erištoho norembaks tedoradnikaks ühtes Maksim Topilinanke (Venäman radon da socialižen kaičemižen ministr vozil 2012—2020).

Venäman rahoiden ministerstvas

Vodel 1990 mäni radole RSFSRan rahoiden ministerstvaha. Kazvoi sigä karjerpordhidme ministerstvan radnikaspäi ministarn ezmäižehe varapämehesai (radvoded):

• 1990 — 1. kategorijan ekonomist, RSFSRan rahoiden ministerstvan valdkundaližen b'udžetan ühthižen erišton päekonomist;
• 1992 — päekonomist, Venäman rahoiden ministerstvan B'udžetan departamentan B'udžetpolitikan da tarkištelendan erišton pämez';
• 1995 — Venäman rahoiden ministerstvan B'udžetan departamentan varapämez' — Venäman rahoiden ministerstvan B'udžetan departamentan konsolidiruitud b'udžetan ühthižen erišton pämez';
• 1996 — Venäman rahoiden ministerstvan B'udžetan departamentan varapämez';
• 1998 — Venäman rahoiden ministerstvan B'udžetan departamentan pämez', Venäman rahoiden ministerstvan kollegijan ühtnik;
• 1998 — Venäman rahoiden ministerstvan B'udžetpolitikan departamentan pämez';
• 1999 — Venäman rahoiden varaministr;
• 2002 — Venäman rahoiden ezmäine varaministr;
• 2004 — Venäman rahoiden ezmäine varaministr (oli pandud necile radsijale jäl'ghe administrativišt reformad Venämal, miččen mödhe federaližiden ministroiden ezmäižiden varapämehiden lugumär vähenzoitase).

Golikovan pärad Venäman rahoiden ministerstvas oli federaližen b'udžetan projektan vaumičend. Paiči b'udžetan tegemišt Venäman rahoiden varaministran sijal Golikova ohjanzi b'udžetankeskeižiden kosketusiden küzundoid, tedon rahoitamišt, valdkundaližen apparatan, socialižen alovehen da varumatomuden küzundoid.

Tugezi ühtes Venäman tervhuden da socialižen kehitoitusen ministranke Mihail Zurabovanke federaližen zakonan vahvištoitust vällendusiden monetizacijas. Vahvištadud zakon lendi rahvahan keskes äi ridoid da vastustuzakcijoid.

Venäman tervhuden kaičemižen da socialižen kehitoitusen ministr

Sügüz'kus vodel 2007 Golikova oli pandud Venäman tervhuden da socialižen kehitoitusen ministran sijale Viktor Zubkov valdmehištos, tuli necile sijale jäl'ghe Mihail Zurabovad.

Semendkus vodel 2008 Venäman prezidentan Dmitrii Medvedevan käskön mödhe möst oli pandud Venäman tervhuden da socialižen kehitoitusen ministran sijale Vladimir Putinan valdmehištos. Vodelpäi 2009 ühtel aigal oli Federaližen tervhuz'kaičemižen fondan pämehen radsijan mödhe. Vilukus vodel 2010 mülüškanzi Valdmehišton laudkundaha ekonomižen kehitoitusen da integracijan mödhe.

Golikovan radaigan Venäman tervhuden kaičendan da socialižen kehitoitusen ministerstvas oli pidetud pensijan reform, miččen mödhe pohj- da kaičendpencii oli ühtenzoittud, ühthine socialine nalog oli vajehtadud kaičend kaičuzmaksuks, oli suretud maksud 26 procentaspäi 34 procentahasai, oli tehtud pensijoiden ližarahoituen programm. Uz' vajehtuz tehihe zelliden kävutamiženke: oli vahvištadud zakon, mitte toi zelliden arvoiden uden vajehtuzsisteman, tegi uded küzundad farmacevtikan tegeližuden pol'he. Golikovan radon aigan oli pästtud eloho erazvuiččed programmad, miččiden keskes oli rahvahaližen verislužban tegemine, jugedoiden läžundoiden profilaktik (onkologii, südäin, naižiden tervhuz'), travmotologižiden keskusiden tegemine pidust' pädorogoid. Golikovan erazvuiččed iniciativad, ozutesikš pensijan sisteman reform da ühthižen socialižen nalogan vajehtuz kaičuzmaksuiš, lendiba teravid paginoid Venäman ekonomižen kehitoitusen ministerstvas da Rahoiden ministerstvas. No Golikova vahvas pidi ičeze tahtod.

Golikovan ohajndusel oli pästtud eloho rahvahaline "Tervhuz'"-projekt — programm lekar'abun parembzoitusen mödhe. Vodel 2010 Golikova starinoiči Valdkundližes Dumas "Dostupnaja sreda" — valdkundaližen programman projektas, miše abutada invalidoile da vähänmobil'nijoile eläjile päzuda objektoihe da korgenzoitta heiden elon tazod. Nece oli ezmäižen haškun Ühtenzoittud rahvahiden organizacijan "Invalidoiden oiktusiš" — konvencijan vahvištoitusehe Venämal.

Venäman prezidentan abunik

Semendkus vodel 2012 oli tehtud Venäman prezidentan abunikaks. Aigemba tehtud Venäman tervhuz'kaičemižen da socialižen kehitoitusen ministerstv, kus hän oli pämehen, oli heittud da jagoihe kahthe erižehe erištoho: Venäman radon da socialižen kaičemižen ministerstv da Venäman Tervhuz'ministerstv, kus pämehikš tegihe Golikovan enččed pämehed — Maksim Topilin (Venäman Radon ministerstv) da Veronika Skvorcova (Venäman Tervhuz'ministerstv).

Venäman prezidentan administracijas valdkundan pämez' tariči Golikovale pidäda homaičuses Abhazijan da Suvi-Osetijan social'no-ekonomižen kehitoitusen küzundoid. Uhokus vodel 2012 Golikova tegihe udeks tehtud Venäman prezidentan kahten komissijan pämeheks: veteranoiden azjoiden mödhe da invali и по делам инвалидов. Tal'vkus vodel 2012 Golikova sanui, miše Suvi-Osetijan da Abhazijan udessündutamine enččiden pämehidenke mäni "korrupcijanke". Kezakus vodel 2013 Venäman prezidentan administracii tegi Venäman prezidentan erišt social'no-ekonomižen ühthižradon mödhe SNG-valdkundoidenke, Abhazijanke, Sivi-Osetijanke, miččen pämeheks tegihe Golikovan enzne pämez' (Venäman tervhuden da socialižen kehitoitusen ministerstvas) Jurii Voronin. Uden erišton pämeheks tegihe Golikova.

Heinkus vodel 2013 Golikova oli pandud kandidatoiden lugetišehe Venäman Lugendpalatan pämehen sijale. Sügüz'kus vodel 2013 Vladimir Putin koumes kandidataspäi valiči Golikovad da andoid hänen kandidaturad Valdkundaližehe Dumaha.

Venäman Lugendpalatan pämez'

20. sügüz'kud vodel 2013 Valdkundaline Duma tugezi Tatjana Golikovan kandidaturad ("tugedab" — 415, "vasthapäi" — 5), tegi händast Venäman Lugendpalatan pämeheks. Necil-žo päiväl Venäman prezidentan käskön mödhe hän oli heittud Venäman prezidentan abunikan sijalpäi, sikš ku mäni toižele radole.

Golikovan radon aigan Lugendpalat tegi 1 480 tarkišteluz- da ekspert-analitišt azjtegod 11 709 objektas. Löutud vigoiden da keskustusiden ühthine summ, miččed oli kävutadud b'udžetan sistemas, oli 3,9 trillionad rubl'ad (om löutud 18 481 vigad). Lugendpalatan tarkištelusiden aigan oli löutud 1209 administrativišt vigad da avaitud 128 kriminališt azjad.

Üks' kaikiš znamasižišk Golikovan Lugendpalatan sistemkodvindoišpäi tegihe "Vostočnii"-kosmodroman kodvind. Palatan arvoiden mödhe man infrastrukturan objektoiden sauvomižen maks oli suretud enamba mi 13 milliardaha rubl'aha. Auditorad peitihe shemoid, miččiden mödhe b'udžetan rahad kävutadihe ei muga kut tariž, pidi azotada edelišt sauvomižen maksun surenzoitust.

17. semendkud vodel 2018 Venäman prezident Vladimir Putin pakiči Valdkundališt Dumad päzumaha Golikovad Lugendpalatan pämehen sijalpäi. Aigemba Venäman premjer-ministr tariči Golikovan kandidaturad vice-premjeran sijale openduz-, tervhuz'- da socialižen politikan küzundoiden mödhe.

Vice-premjer

18. semendkud vodel 2018 Venäman prezident vahvištoiti uden valdmehišton, miččen pämeheks tegihe Dmitrii Medvedev, Golikova sai sigä Venäman valdmehišton varapämehen sijan. Hän zavodi ohjata sociališt politikad.

Venäman pensijan reforman vaumičendan aigan 6. sügüz'kud vodel 2018 Golikova oli pandud eriližen Venäman prezidentan ezitajan parlamentas, konz kactihe zakonprojektad pensijoiden andmižen da maksuiden küzundoiden mödhe.

29. vilukud vodel 2020 Golikova operativnijan štaban pämeheks COVID-19 koronavirusan infekcijan tomižen da sirdämižen vasthapäi Venämal.

Venäman prezidentan käskön mödhe 29. semendkuspäi vodelpäi 2020 oli pandud videks vodeks Kurčatovskijan institutan tarkišteluznevondišton ühtnikaks.

Vodel 2024 tegihe orgkomitetan pämeheks Kanzan voden tegemižen mödhe (2024).

11. semendkud 2024 Mihail Mišustin andoid vahvištoitusele Valdkundaližehe Dumaha uden valdmehišton jouk, tariči Golikovan kandidaturad vice-premjeran sijale. 13. semendkud Valdkundaline Duma vahvištoiti händast necile sijale. 14. semendkud Venäman prezident allekirjuti käskön panemižes. Federaline agenstv rahvahuziden azjoiden mödhe om anttud ohjata Golikovale. Hän ohjandab: tervhuz'kaičendad, genetikan da medicinan tedooppindad, hän tegeb da pästab eloho, kontroliruib rahvahaližid projektoid: "Demografii", "Tervhuz'kaičend" da "Kul'tur.

13. kezakud 2024 Venäman valdmehišton käsköl om pandud Federaližen Kodiman kinematografijan cocialižen da ekonomižen tugen fondan nevondišton pämeheks (Kinofond).

8. heinkud vodel 2024 Venäman prezidentan käsköl ühtni rahvahiden kosketusiden nevondištoho, miččen tegi prezident Vladimir Putin.

Ičeze elo

Kanz

Tatjana Golikova om mehel toižen kerdan.

• Ezmäine mužik: Drovosekov Andrei Vladimirovič (sünd. 15.10.1964), "Severstal'"kompanijan top-menedžer, kaiken aigan eläb da radab Venas, Avstrijas. Hän oli mehel viž vot; Golikovan sanoiden mödhe, erigandusen sü oli "erazvuiččiš kacundoiš eloho".

• Toine mužik: Viktor Borisovič Hristenko (hänen täht nece oli mugažo toine meheluz, naiba vodel 2003) — sil aigal Venäman Valdmehišton varapämez'. Golikoval ei ole ičeze lapsid. Om "Nanolek"-farmacevtkompanijan üks' pämehišpäi, sen tegii om mužikan poig Vladimir Hristenko.

Golikova — ortodoksine; oli risttud, konz hänel oli 22 vot. Vodel 2001 Hristenko da Golikova tegiba hüväntegii Fond Starican Pühä-Uspenjan monastirin udessündutamižen täht. Fondan tegijoiden keskes oma mugažo sured biznesmehed. Ühtmižes monastirin udessündutamižen radho Golikova da Hristenko saiba pühäkodin pauklahjad.

Kundaline rad da hüväntegod

Golikova mülüb "Sojedinenie"-soged-kurdehiden ristituiden Tugifondan popečitel'skijaha nevondištoho.

Pauklahjad

• II stepenin orden "Kodiman hüväs rados" (29. vilukud vodel 2016) — valdkundan suriš satusiš da äivoččes hüväs rados.
• III stepenin orden "Kodiman hüväs rados" (2012).
• IV stepenin orden "Kodiman hüväs rados" (23. tal'vkud vodel 2008) — hüväs abus Suvi-Osetijan rahvahale.
• Arvostelusen orden (9. uhokud vodel 2006) — Suren Kodiman voinan 60-voččen Vägestusen päivän hüväs vaumičendrados da praznikan tegemižes.
• Sebruden orden (16. kül'mkud vodel 2006) — sures panendas valdkundoiden pämehiden da valdmehišton — "Ühesan gruppan ühtnikoiden" vastusen vaumičendaha da tegemižehe Piteriš.
• I stepenin ordenan medal' "Kodiman hüväs rados" (25. redukud vodel 2004) — aktivižes rados zakonoiden tegemižes.
• II stepenin ordenan medal' "Kodiman hüväs rados" (12. sulakud vodel 2001) — hüväs raha-ekonomižes rados.
• P. A. Stolipinan I stepenin medal' (9. uhokud vodel 2016) — valdkundan social-ekonomižen kehitoitusen küzundoiden hüviš pätandoiš da äivoččes hüväs rados.
• Venäman arvostadud ekonomist (22. uhokud vodel 2004) — hüväs raha-ekonomižes rados.
• Venäman prezidentan arvkirjeine (10. uhokud vodel 2011) — äivoččes hüväs rados valdkundas.
• Venäman Valdmehišton arvkirjeine (7. sügüz'kud vodel 2002) — hüväs raha-ekonomižes rados valdkundas da Venäman Rahoiden ministerstvan 200-voččeks jubilejaks.
• Orden "Hüväs rados Dagestanan Valdkundas" (27. kezakud vodel 2011).
• Medal' "Hüväs rados Čečn'an Valdkundas" (5. uhokud vodel 2009) — sures panendas Čečn'an Valdkundan tervhuden kaičendaha da socialižehe avoveheze
• Pühän ravnoapostolan Ol'ga-kn'gin'an I stepenin orden (Venälaine ortodoksine pühäkodi, 2010) — abus Starican Pühä-Uspenjan monastirin udessündutamižes.
• Pühän Jefrosinijan, sur'znamasižen Moskvan kn'agin'an I stepenin orden (Venälaine ortodoksine pühäkodi, 2017), III. stepenin orden (2021).
• Venäman biznesan da akademijan rahvahaližen "Olimpia"-premijan laureat vodel 2003.
• Rahvahidenkeskeižen "Voden 2008 person" — premijan laureat "Person valdkundaližes ohjanduses"-nominacijas.
• "Ogon'ok"-kulehtesen "100 kaikid azjakahid Venäman naižid"-reitingas, mitte oli paindud keväz'kus vodel 2014, sai 3. sijan.
• Valdkundaližen Duman arvznam "Satusiš parlamentarizman kehitoituses" (2016).

Klassan čin

• Venäman nügüdläine valdkundaline 1. klassan nevonik (28. elokud vodel 2003).