Semiluki

<table class="infobox infobox- " style="" data-name="El6ndtaho" >

Semiluki (ven.: Семилу́ки) om Venäman lidn da lidnankund Voronežan agjan lodehes. Se om Semilukin rajonan administrativine keskuz da pala.

Istorii

Arheologad löutihe ristitun amuižid seižutesid i 16.-17. voz'sadan lidneihuzid lidnan ümbrištos. «Voronež — Kursk»-raudten Semiluki-seižutezpunkt om saudud vl 1894, nimitihe lähižen žilon mödhe. Semiluki-žilo om olmas nügüd'-ki ani lidnan pohjoižen röunan taga, sen nimituz libub Donan seičemes känmaspäi (ven. семь лук) läheližes tahondas.

Nügüdläižen eländpunktan aluz om pandud seižutezpunktas ümbri vll 1926−1932 kuti Semiluki-radnikžilo rajonankeskusen statusanke, 1932. voz' om alusenpanendan oficialine. Sai lidnan statusad vn 1954 18. päiväl kül'mkud.

Semiluki šingotase sauvondmaterialiden pästandal (lämoinvastaižed tegesed, sauvondmaterialiden kombinat), mugažo sömkombinat i meblin edheotand ratas lidnas.

Geografijan andmused

Lidn sijadase rajonan suvipäivnouzmaižel röunal, vedase 10 km pidust' Don-jogen oiktad randad, 130 m ü.m.t. keskmäižel korktusel. Devic-jogi (ven.: Деви́ца 89 km pitte) lankteb Donha lidnan suvipalas. Agjan Voronež-keskuz om ühtes kilometras päivnouzmha Donan vastrandal. Semiluki ühtenzoitase senke kahtel avtotesildal Donas päliči pohjoižes i suves, raudtesild tuleb lidnan keskuzpalaha. Semiluki-seižutezpunkt radab lidnan keskuzpalas.

Semiluki om lidnankundan üks'jäine eländpunkt. Lidnankundan pind — 16,04 km².

Eläjad

Vl 1939 žilon ristitišt oli 7 300 eläjad. Vn 2010 Venäman rahvahanlugemižen mödhe lidnan eläjiden lugu oli 26 023 ristitud, rajonan kaks' videndest. Kaikiš suremb lidnan ristitišt om 25..26 tuhad eläjid vll 2002−2003 i vspäi 2010 (26 797 rist. vl 2017). Ortodoksižen hristanuskondan koume jumalanpertid i časoun' oma olmas lidnas.

Rahvahad (2010): venälaižed — 97,3%, ukrainalaižed — 1,0%, toižed rahvahad — 1,7%.

Professionaližen opendusen aluzkund om Semilukin politehnine kolledž.

Galerei

• 
  Lidnfartal (2008)
• 
  Ph. Mitrofan Voronežalaižen jumalanpert'
  (om saudud vll 1994−2010,
  vn 2011 nägu)
• 
  Don-jogi lidnanno
• 
  Raudteseižutezpunktan sauvuz
  vl 2008
• 
  Muštnik sodalendajiden oiktastuseks

Irdkosketused

• Lidnankundan tobmuden aluzkundoiden sait (semiluki-gorod.ru). (ven.)