Bobrov (lidn)

<table class="infobox infobox- " style="" data-name="El6ndtaho" >

Bobrov (ven.: Бобро́в) om Venäman lidn da lidnankund Voronežan agjan keskuzpalan päivlaskmas. Se om Bobrovan rajonan administrativine keskuz, mülüb sihe.

Istorii

Vspäi 1685 valdkundmaksoiden Bobrovskii-jurt oli olmas lidnan sijas majagan (ven.: бобр) pramozlan tagut. Eländpunktan aluz om pandud vl 1698 kuti Bobrovskai-slabad (ven.: Бобровская слобода). Slabad sai makundan lidnan statusad vl 1779. «Liski — Povorino»-raudtekeskust läbiti lidnad vl 1895. Toižen mail'man sodan aigan lidn ei olend okkupiruidud nacistoil, no frontan pird oli läz i lidn oli alištunu bombardiruindale, tegimed oliba evakuiruidud. Koume pen't eländpunktad oma mülütadud Bobrov-lidnha vl 2008.

Bobrov šingotase sauvondmaterialiden pästandal (kaks' asfal'ttegint), soitoiden fabrikal, sömtegimištol (lihakombinat, sagudtegim, argvoitegim, leibtegim), villän varažomal.

Geografijan andmused

Lidn sijadase rajonan keskuzpalan päivlaskmas, Bitüg-jogen oiktal randal (ven.: Битю́г 379 km pitte, Don-jogen hura ližajogi), 150 m ü.m.t. keskmäižel korktusel. Matkad Voronežhasai om 84 km lodeheze-pohjoižhe orhal, 104 km avtotel vai 100 km raudtel. Lähembaine lidn om Liski 39 km päivlaskmha-suvipäivlaskmha orhal, 49 km avtotedme vai raudtedme.

Kaks' raudtestancijad ratas lidnas: Bobrov-raudtestancii pohjoižes i Bitüg-raudtestancii suvipäivlaskmas, sen ližaks «210. km»-seižutespunkt om olmas niiden keskes lidnan päivnouzmas. «Don»-avtote (M4-trass) mäneb 10 km päivlaskmha lidnaspäi.

Koume žilod mülüdas lidnankundha Bobrovan ližaks. Lidnankundan pind — 322,89 km².

Eläjad

Vl 1939 lidnan ristitišt oli 7 000 eläjid. Vn 2010 Venäman rahvahanlugemižen mödhe lidnan eläjiden lugu oli 19 738 ristitud, lidnankundan — 20 345 ristitud, rajonan kaks' videndest. Kaikiš suremb lidnan ristitišt oli 19 tuhad eläjid vl 1931 i 21..22 tuhad eläjid vll 1979−2001 (22 100 rist. vl 1998). Vl 2018 kaik 21 122 ristitud elihe lidnankundas.

Rahvahad (2010): venälaižed — 98,2%, toižed rahvahad — 1,8%.

Ortodoksižen hristanuskondan kaks' jumalanpertid oma olmas lidnas.

Voronežan agjan kul'turan profškol i Bobrovan agrariž-industrialine kolledž oma lidnan professionaližen opendusen aluzkundoikš.

Galerei

• 
  Jumalanmaman Emäganpäivän pühäpert' (om saudud vll 1857−1863), vn 2011 nägu
• 
  MiG-23 MLD — muštnik sodalendajiden oiktastuseks (2008)
• 
  Vägimehiden allei lidnan puištos (2014)
• 
  Bobrov-päraudtestancii vl 2015

Irdkosketused

• Lidnankundan Administracijan sait (bobrovcity.ru). (ven.)
• Lidnankund Bobrovan rajonan tobmuden adm-bobrov.ru-saital. (ven.)