Šadajev Maksut Igorevič

<table class="infobox infobox- " style="" data-name="Valdmez'" itemscope itemtype="http://schema.org/Person">Maksut Igorevič Šadajev

Maksut Igorevič Šadajev (ven.: Максут Игоревич Шадаев, ) — venälaine valdmez', Venäman lugukehitoitusen, sidon da joukkommunikacijoiden ministr 21. vilukuspäi vodelpäi 2020. Venäman nügüdläine valdkundaline II klassan nevonik (2014). Venäman lehtmehiden sebran ühtnik.

Elostarin

Maksut Šadajev om sündunu 11. kül'mkud vodel 1979, toižiden tedoiden mödhe Moskvas, toižiden tedoiden mödhe — Nižnijas Novgorodas. Tatarialaine. Vodelpäi 1999 radoi kompanijoiš tedo-kommunikativižiden tehnologijoiden erištos.

Vodel 2004 Šadajev lopi Moskvan valdkundaližen socialižen universitetan (nügüd' — Venäman valdkundaline socialine universitet) "sociologii"-special'nostin mödhe. Necil-žo vodel tegihe Leonid Dododžonovič Reimanan nevonikaks. 6. uhokud vodel 2006 Šadajev tegihe Valdkundaližiden programmoiden, infrastrukturan kehitoitusen da necen erišton röunatud radonaigan kävutamižen departamentan pämeheks.

Vozil 2000—2001 Šadajev ohjanzi "Eidvaizers"-projektad "Arrava Internet Management"-kompanijas, se oli lähtnu JUKOSaspäi da oli registriruidud San-Mateos, Kalifornijas (Amerik). Kezakus vodel 2000 kompanii radaškanzi Venämal. Redukus vodel 2000 Šadajev oli "Arrava Internet Advisors"-kompanijan pämehen internet-strategijan mödhe.

Vozil 2002—2004 Šadajev radoi IBS Group-holdingas, kus oli internet-pätusiden erišton biznesan kehitoitusen erišton pämehen, jo heinkus vodel 2003 tehihe pämeheks biznesan kehitoitusen mödhe.

Heinkus vodel 2004 Šadajev tuli "Voshod"-tedo-oppind institutan Leonid Juhnevičan pämehen nevonikan sijale.

9. redukud vodel 2007 mülüškanzi ühtes Reimananke "Rosinfokominvest"-venčurnijan fondan pämehiden nevondištoho, mitte om Federaližes agenstvas valdkundaližen elomišton ohjandusen mödhe, se oli tehtud Venäman lugukehitoitusen, sidon da joukkommunikacijoiden ministerstvan tugel.

Jäl'ghe sidä, konz semendkus vodel 2008 Tedotehnologijoiden da sidon ministerstvan sijas oli tehtud Venäman lugukehitoitusen, sidon da joukkommunikacijoiden ministerstv, miččen pämeheks tegihe Igor' Ščogolev, Šadajev radaškanzi sigä informatizacijan da tedotehnologijoiden valdkundaližen politikan departamentan pämehen.

Sügüzel vodel 2008 Šadajev tegihe pämehen Sergei Jevgenjevič Nariškinan abunikaks, holdui Venäman prezidentan tedorahvazkundan kehitoitusen nevondišton radon tegemižes, mugažo biometrižiden pasportoiden projektan tegemižes. Uhokus vodel 2009 Šadajev oli pandud Venäman prezidentan ohjanduzranikoiden varan "ezmäižehe sadaha". Oli konstruktoroiden nevondišton pämehen — uden pol'ven pasport-vizoiden azjbumagoiden tegemižen da tarkištelusen valdkundaližen sisteman päkonstruktoran.

Vodel 2012 Šadajev tegihe Venäman Valdkundaližen Duman pämehen nevonikaks. Holdui "Luguparlament"-projektan pästamižes.

11. uhokud vodel 2014 Šadajev oli pandud Moskvan agjan valdkundaližen ohjandusen, tedotehnologijoiden da sidon ministran sijale. Mülüškanzi Moskvan agjan valdmehištoho, mittušt ohjanzi Moskvan agjan pämez' Andrei Vorobjov. 29. sügüz'kud vodel 2016 tegihe mugažo Podmoskovjen valdmehišton varapämeheks. Šadajevan ohjandusel oli pästtud eloho "Dobrodel"-portal — Moskvan agjan ühthine abidoičusiden da taričusiden kirj. 14. sügüz'kud vodel 2018 jäl'ghe Moskvan agjan valdmehišton heitändad Šadajev ei mülütand udhe valdmehištoho, tuli radmaha gubernatoran Vorobjovan nevonikan sijale ilman rahoita.

Semendkuspäi vodelpäi 2017 Šadajev oli mugažo Venäman prezidentan administracijan ezmäižen varapämehen nevonikan ičeze tahton mödhe ilman rahoita, ohjanzi regionaližiden valdmehiden tedopolitikad socialižiš verkoiš.

26. sügüz'kud vodel 2018 Šadajev oli pandud "Rostelekoman" vice-prezidentaks luguplatformoiden mödhe, uhokuspäi vodelpäi 2019 ühtenzoiti necidä radod "RT Labs"-organizacijan pämehen radonke, miččen 100 % akcijad oli valdkundaližel operatoral.

21. vilukud vodel 2020 Venäman prezidentan Vladimir Putinan käskön mödhe oli pandud Venäman lugukehitoitusen, sidon da joukkommunikacijoiden ministran sijale. Hänen ezmäine taričend päradsijal, mitte oli sanutud än'heze Venäman valdkundaližen nevondišton ištundal, oli siš, miše laskta vägierištoiden operativnikoile sada tedoid ristituiden polhe onlain-formatas ilman sudan pätusita, no jäl'ghe Dmitrii Peskovan korhoteldud reakcijad Šadajev sanui, miše händast värin el'getihe.

14. semendkud vodel 2024 Valdkundaline Duma möst vahvištoiti Šadajevad Venäman lugukehitoitusen, sidon da joukkommunikacijoiden ministran sijale, necil-žo päiväl Venäman prezident allekirjuti käskön hänen panendas.

Kanz

Om kaks' tütärt.

Pauklahjad

• Arvostelusen orden (18. kül'mkud vodel 2010) — tarbhaižes aigas pästtud eloho verazmaižiden parportoiden kävutamižes, miččiš oliba lugutedod;
• II stepenin ordenan medal' "Hüväs rados Kodimal" (29. semendkud vodel 2019) — sadud radsatusiš da äivoččes hüväs rados.

Lähtked

• Энциклопедия ТАСС, 2024. Шадаев, Максут Игоревич. Министр цифрового развития, связи и массовых коммуникаций РФ
• Биография Максута Шадаева // Министерство цифрового развития, связи и массовых коммуникаций Российской Федерации
• Биография нового главы Минкомсвязи Максута Шадаева // ТАСС
• Биография Максута Шадаева // Finparty.