Vihorevk

<table class="infobox infobox- " style="" data-name="El6ndtaho" >

Vihorevk (ven.: Вихоревка [ˈvʲixərʲɪfkə]) om Venäman lidn da lidnankund Irkutskan agjan keskuzpalan päivlaskmas. Se om Bratskan päivlaskmaine ezilidn, Bratskan rajonan üks'jäine lidn.

Istorii

Eländpunktan aluz om pandud vl 1947 sauvomha «Taišet — Len»-raudted, nimitihe jogen mödhe. Kävutihe ottud plenha verazmalaižiden töid. Radnikžilo sai lidnan statusad vl 1966.

Vihorevk šingotase raudten edheotandoil (kaks' vedimdepod, vagondepo, raudten distancii, kohenduzedheotandad) i mecan varhapanendal da ümbriradmižel. Kaks' penitenciarišt aluzkundad oma lidnas.

Geografijan andmused

Lidn sijadase Vihorev-jogen hural randal (ven.: Вихорева, Angar-jogen hurapol'ne bassein), Vihorev-jogen da sen Ub'-ližajogen keskes, 365 m ü.m.t. keskmäižel korktusel. Matkad Irkutskhasai om 472 km suvipäivnouzmha-suvhe orhal, 600 km avtotedme vai 916 km raudtedme. Lähembaine lidn om Bratsk 10 km päivnouzmha orhal sen röunhasai, 43 km avtotedme (Bratskan keskushesai) vai 30 km raudtedme (Bratsk-stancijhasai).

Vihorevk om lidnankundan üks'jäine eländpunkt. Lidnankundan pind — 1 325,87 km².

Eläjad

Vn 2010 Venäman rahvahanlugemižen mödhe eläjiden lugu oli 22 520 ristitud, rajonan kaks' videndest. Kaikiš suremb ristitišt oli enamba 24 tuhad eläjid vll 1992−2009 (24 800 eläjad vll 2005−2006). Kaik 21 279 ristitud elihe lidnas vl 2017.

Ortodoksižen hristanuskondan viž pühäpertid oma avaitud lidnas: ph. Mikulai-čudonsädajan pühäpert' (om saudud vll 1994−1997), Mikulai II-carin-moknikan pühäpert' i koume časounäd.

Bratskan professionaližen tehnikuman Vihorevkan filial om lidnan professionaližen opendusen aluzkundaks.

Galerei

• 
  Muštnik Jeniseiskan Vihor' Savin-sur'oigenuden oiktastuseks, om pandud vl 2015
• 
  Puruvedim-muštnik
• 
  Vihorevk-päraudtestancijan sauvuz vl 2018

Irdkosketused

• Lidnankundan tobmuden aluzkundoiden oficialine portal (admvih.ru). (ven.)