Veber Maks

<table class="infobox infobox- " style="" data-name="Personalii" >

Maks Veber (saks.: Max Weber), täuz' nimi om Maksimilian Karl Emil' Veber (saks.: Maximilian Carl Emil Weber; sünd. 21. sulaku 1864, Erfurt-lidn, Prussii — kol. 14. kezaku 1920, Münhen, Germanijan imperii) oli saksalaine filosof, sociolog, istorik, jurist da ekonomist.

Lugetas tedomest sociologijan ühteks alusenpanijoišpäi ühtes Emil' Dürkgeimanke i Karl Marksanke. Veberan tedomel'hetartusen päobjekt oli ristitkundan vajehtusen processad, sen päličmänend veroližes toižendaspäi nügüd'aigaižele: racionalizacii i sekulärizacii. Opponirui Marksan istorižen materializman koncepcijad i ozuti, miše religijan kul'turine paineg om tärged el'gendamha Päivnouzmman kapitalizman ižanduzformad.

Biografii

Veber openuškanzi Geidel'bergan universitetas vl 1882, voden saldatusen jäl'ghe openui Berlinan universitetas i sai juristan arvod. Jätkusti opendust siš, vl 1889 sai juridižen tedodoktoran arvod. Maks nai vl 1893, Marianna Veber (neiččel Šnitger, 1870−1954) oli hänen ak, mugažo tedomez', par ei voind sündutada lapsid i ei olend heid.

Maks Veber radoi universitetan opendajan Berlinas, Fraiburgas i Geidel'bergas vhesai 1899, sid' läžui psihologižikš tatan surman jäl'ghe — rideganzi tatanke, i Maks Veber-vanhemb koli kahtes kus. Tedomez' tervehtihe i oli otnus tedoradmižhe, vl 1907 sai elod jäl'gusen mödhe.

Ezmäižen mail'man sodan aigan Veber oli armijan varaoficeran, organizui läžundkodid Geidel'bergas. Vl 1919 ühtni Veimaran konstitucijan sädamižhe. Tedomez' tartutihe ispanižel grippal i koli pnevmonijaspäi.

Valitud tedotöd

• «Protestantine etik i kapitalizman heng» (saks.: Die protestantische Ethik und der «Geist» des Kapitalismus, 1904−1905)
• «Kitain religii: Konfucijanizm i daosizm» (Konfuzianismus und Taoismus, 1915)
• «Indijan religii: Induizman i buddizman sociologii» (Hinduismus und Buddhismus, 1916)
• «Amuine judaizm» (Das antike Judentum, 1917−1919, ezm. pästand 1921, om vaumitud Marianna-akal)
• «Politik kucmuseks i professijaks» (Politik als Beruf, 1919)
• «Ižanduz i ristitkund» (Wirtschaft und Gesellschaft, ezm. pästand 1922, om vaumitud Marianna-akal) (magnum opus — elon päine tö)
• «Ühthine ekonomine istorii» (Wirtschaftsgeschichte, ezm. pästand 1923)
• «Valdkundan sociologii» (Staatssoziologie, ezm. pästand 1956)

Homaičendad

Nece kirjutuz om vaiše ezitegez. Tö voit abutada meile, ku kohendat sidä da ližadat sihe.