Ussuriisk

<table class="infobox infobox- " style="" data-name="El6ndtaho" >

Ussuriisk (ven.: Уссурийск) om Venäman lidn Merenrandaližen randan suvipäivlaskmas. Se om Ussuriiskan lidnümbrikon (vhesai 2005 — rajonan) administrativine keskuz, randan kahtenz' lidn eläjiden lugun mödhe.

Istorii

Nügüd'aigaižen eländpunktan aluz om pandud sirdanuzil mehil Astrahanin i Voronežan gubernijoišpäi kuti Nikol'skoje-külä vn 1866 elokus, ph. Mikoi-čudonsädajan mödhe. Vl 1893 raudte ühtenzoiti küläd Vladivostokanke. Vn 1898 3. päiväl sulakud külä sai lidnan statusad, nimitihe sidä Nikol'sk:aks. 20. voz'sadan augotišes ukrainalaižed sirdanuded oliba ristitišton enambuses. Vl 1926 udesnimitihe lidnad Nikol'sk-Ussuriiskijaks erištamha NSTÜ:n toižiš lidnoišpäi. Vozil 1935−1957 lidnan nimi oli Vorošilov, vspäi 1957 nimitase nügüdläižikš.

Ussuriisk šingotase sömtegimištol (sahar, maidproduktad, likörad da vin), raudtevedimiden kohenduztegimel, kodielektronikan ühthekeradamižen tegimel, kartonkombinatal i kebnal tegimištol (sobad, nahkkengäd, mebel'fabrik).

Geografijan andmused

Lidn sijadase katl'uses, Hankanveren tazangištol, sambnuziden vulkanoiden keskes, 33 m keskmäižel korktusel valdmeren pindan päl. Pened joged oma Rakovk i Komarovk, mülüdas Razdol'nai-jogen (kit.: 绥芬河 Suifen'-He) hurapol'žhe basseinha, se jokseb Amuran lahthe läz Vladivostokad. Matkad Vladivostokhasai om 76 km suvhe orhal vai 97 km «Ussuri»-avtotedme (A370), Kitain röunhasai — 50 km päivlaskmha orhal.

Kaik 37 eländpunktad mülüdas lidnümbrikho Ussuriiskan ližaks: kaks' žilod, kaks' raudtestancijad da 33 küläd ühesal territorijal. Lidnümbrikon pind om 3690 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 158 004 ristitud, lidnümbrikon — 184 046 ristitud. Vl 2017 kaik 170 660 ristitud elihe lidnas i 196 863 ristitud kaikes lidnümbrikos. Lidnan i lidnümbrikon kaikiš suremb ristitišt oli vl 2020: lidnas elihe 173 640 ristitud, kaikes lidnümbrikos — 199 341 ristitud.

Rahvahad (lidnümbrik vl 2010, enamba 1%, ozutadud rahvahudenke): venälaižed — 91,0%, korejalaižed — 3,0%, ukrainalaižed — 2,4%, toižed rahvahad — 3,6%.

Edeline lidnümbrikon pämez' om Nikolai Rud' (sügüz'ku 2014 — sügüz'ku 2019).

Galerei

• 
  Kaičendministrusen sodaläžundkodi nomer 439 (2016)
• 
  Muitan sauvuz (2013)
• 
  Jumalanmaman Katken jumalanpert', vn 2008 nägu (kivine om saudud vll 1907−1914)
• 
  Jumalanmaman Sündundan naižjumalankodi, vn 2008 nägu
• 
  Ussuriiskan vedimenkohenduztegimen tulend vl 2011
• 
  Mererandaline valdkundaline maižanduzakademii (2010)
• 
  Ussuriiskan suvorovan sodaškol (2013)
• 
  Ussuriiskan lidnümbrikon dramteatr V. Komissarževskajan nimed (2017, ende Rahvahaline pert', om saudud vll 1907−1908)
• 
  Lapsiden läžundkodi (2013, ende Nevondkundoiden pert')
• 
  Ussuriisk-päraudtestancijan sauvuz vl 2011

Irdkosketused

• Lidnümbrikon Duman oficialine sait (дума-уссурийска.рф). (ven.)
• Lidnümbrikon administracijan oficialine sait (adm-ussuriisk.ru). (ven.)