Kovdor

<table class="infobox infobox- " style="" data-name="El6ndtaho" >

Kovdor (ven.: Ковдо́р) om Venäman lidn Murmanskan agjan suvipäivlaskmas. Se om Kovdoran rajonan-lidnümbrikon administrativine keskuz.

Istorii

Eländpunktan aluz om pandud vozil 1933−1934 kuti geologiden Kovdorjärv-žilo (ven.: Ковдорозеро) tedoidamha kivendoiden löudmižsijid. Vozil 1940−1950 türmatud mehed eliba täs, sauvoiba raudtesarakod.

Panihe oficiališt radnikžilod vl 1953 sauvomha da kävutamha küllästamižtegint sijaližel raudkivendol, mugažo sädamha loštkivifabrikad. Nimitihe Kovdoro-järven mödhe. Kätihe radnikžilod lidnanvuiččeks žiloks vl 1956. Kovdor sai lidnan statusad vl 1965.

Kovdor šingotase raudkivendon (päpaloin), apatitan i cirkonijan hapandusen samižel kar'jermahtusel, Kovdoran kaivuzküllästamižkombinatal (mülüb «Evrohim»-gruppha). Loštkiven edheotand ei ole rados.

Geografijan andmused

Lidn sijadase Kovdor-järven randoil, 209 m ü.m.t. keskmäižel korktusel. Eländfartalad oma pohjoižpolel järvespäi, küllästamižtegim da Kovdor-raudtestancii sijadasoiš suvipolel, pudotez ühtenzoitab niid. Matkad Suomenman valdkundröunhasai om 20 km päivlaskmha, Murmanskhasai om 190 km pohjoižpäivnouzmha orhal vai 290 km avtotedme. Lähembaižed lidnad oma Polärnije Zori i Kandalakš 90 km päivnouzmha orhal.

Klimat om subarktine kontinentaline. Voden keskmäine lämuz om +0,5 C°, kezakun-elokun +11..+14 C°, tal'vkun-uhokun −8..−11 C°. Paneb sadegid 609 mm vodes, enamba kezakus-elokus (68..84 mm kus), vähemba uhokus-sulakus (33..36 mm kus).

Eläjad

Vn 2010 Venäman rahvahanlugemižen mödhe lidnan eläjiden lugu om 18 820 ristitud, rajonan-lidnümbrikon ristitišton viž kudendest. Kaik 16 892 eläjad oli lidnas vl 2017. Kaikiš suremb lidnan ristitišt oli 30 478 eläjad vl 1989.

Ortodoksižen hristanuskondan Pühän Jumalanmaman Emäganpäivän jumalanpert' om saudud vll 1994−1996.

Kovdoran politehnine kolledž om lidnan professionaližen opendusen aluzkundaks.

Galerei

• 
  «Piramida»-klub (2008)
• 
  Kovdoran kaivuzküllästamižkombinat (2006), nägu Leninan irdan agjas
• 
  Kar'jer Kovdoranno (2005)
• 
  Škol nomer kaks' i počt (2008)
• 
  Torg lidnümbrikon administracijan sauvusenke (2010)

Irdkosketused

• Kovdoran rajonan-lidnümbrikon tobmuden aluzkundoiden oficialine sait (kovadm.ru). (ven.)