Kerav

<table class="infobox infobox- " style="" data-name="El6ndtaho" >

Kerav (suom.: Kerava [ˈkerɑʋɑ], roč.: Kervo) om Suomenman lidn valdkundan suves. Se sijadase Udenma-agjan keskuzpalas, valdkundan 31. lidn eläjiden lugun mödhe.

Istorii

Üläkerav- (suom. Ylikerava) i Alakerav-küläd oliba olmas lidnan sijas 1440-nziš vozišpäi, mülütihe Sipoon tulendha. Vspäi 1643 Kerav-külä mülüi Tuusulan tulendha. Vl 1862 «Hel'sinki — Hämenlidn»-raudtekeskust läbiti küläd i vedi tegimišton edheotandoid. Keravan municipalitetan aluz om pandud vl 1924 erigoitmižel Tuusulan municipalitetaspäi, se voz' znamoičese lidnan alusenpanendan vodeks. Vspäi 1954 municipalitetan pind kadoti nelländest, sen suvipala sijadase Vantaa-lidnas nügüd'. Vl 1970 kändihe Keravad täudeks lidnaks (suom. kaupunki).

Kerav šingotase industrijaližil parkoil, saudihe niid lidnan päivnouzmas, E75-avtotrassan taga. Pästtas söndtavaroid (olud), tekstilid, metalltegesid (keitimpolen mašiništ — «Metos») i meblid, logistine keskuz.

Geografijan andmused

Keravan kart (2005)

Lidn sijadase Sur' Hel'sinki-regionan päivnouzmas. Keravanjogi (suom.: Keravanjoki 65 km pitte, Vantaa-jogen hura ližajogi, Suomen lahten bassein) läbitab lidnan päivnouzmašt palad. Matkad Tuusulanjärven (5,9 km²) suvižhe randhasai om 5 km päivlaskmha lidnan keskusespäi, Järvenpää-lidnhasai om 5 km pohjoižhe, Hel'sinkihesai — 20 km suvhe avtotel vai raudtedme. Röunatab Tuusulan külämunicipalitetanke päivlaskmas i pohjoižes, Sipoon municipalitetanke päivnouzmas, Vantaa-lidnanke suves. Rahvahidenkeskeine Hel'sinki-Vantaan lendimport om saudud 12 km suvipäivlaskmha.

Vl 2019 lidnan ühthine pind oli 30,79 km², sidä kesken kuivma 30,63 nellikkilometrad, sokaz ma 0,16 km². Kerav jagase 11 nimitadud lidnrajonaks (äilugu suom.: kaupunginosat).

Eläjad

Vl 1980 lidnan eläjiden lugu oli 23 851 ristitud, vl 2016 — 35 511 ristitud. Kaikiš suremb ristitišt om nügüd'. Lidn om Suren Hel'sinkin magaduzrajonaks, i sen ristitišt ližadub kaikuččel vodel.

Vn 2016 andmusiden mödhe, suomen kel' oli mamankeleks 89,6% täht lidnalaižišpäi, ročin kel' — 1,2%, toižed keled — 9,2%. Vspäi 1953 suomen kel' om kundan üks'jäižeks oficialižeks.

Petri Härkönen radoi lidnan edeližen pämehen vll 2010−2016.

Galerei

• 
  Keskuzrajon lidnan ohjastusen pertinke (avar kaks'žiruine)
• 
  Keravan lüteranine jumalanpert' (vspäi 1963)
• 
  Oludtegim (viluku 2009)
• 
  Teatran sauvuz (vspäi 1996)
• 
  Päraudtestancii

Irdkosketused

• Lidnan oficialine sait (kerava.fi) (suom.) i informacii lidnas toižil kelil. (ven.) (roč.)  (angl.)