Jemanželinsk

<table class="infobox infobox- " style="" data-name="El6ndtaho" >

Jemanželinsk (ven.: Еманжели́нск, tot.: Яманъелга) om Venäman lidn da lidnankund Čeläbinskan agjan keskuzpalan pohjoižes. Se om Jemanželinskan rajonan administrativine keskuz.

Istorii

Eländpunktan aluz om pandud Jemanželinskije hilenvarad-radnikžiloks (ven.: Еманжелинские угольные копи) vll 1930−1931 samha kivihil't, nimitihe penen jogen mödhe. Žilo sai lidnan statusad vn 1951 25. päiväl sügüz'kud. Vspäi 1997 kaivused oma sauptud.

Jemanželinsk šingotase «Uralec»-minitraktoriden edheotandal, keramižen savičun tegimel, agregatiž-mehanižel tegimel (maižanduztehnikan kohenduz i varapalad), Uralan pirotehnikan tegimel, omblendfabrikal i kombisömän tegimel.

Geografijan andmused

Lidn sijadase rajonan pohjoižpäivnouzmas, 220 m ü.m.t. keskmäižel korktusel. Hutorskoje-järv om lidnan päivnouzmaižes palas. Jemanželink-jogi (bašk.: Яманйылға «huba jogi» 20 km pitte) lankteb stokutomaha Sur' Sarikul'-järvhe, se levitase ühtes kilometras suvipäivnouzmha lidnaspäi (bašk.: Оло Һарыкүл «pakuine järv» 68 km², ende 103 km²).

«Čeläbinsk — Magnitogorsk»-avtote mäneb 1 km päivlaskmha lidnaspäi. Matkad Čeläbinskan röunhasai om 30 kilometrad pohjoižhe orhal vai avtotedme. Lähembaine lidn om Korkino 15 km pohjoižhe orhal vai avtotedme. Jemanželinsk-raudtestancii om saudud rajonan Zaural'skii-žilos 5 km lodeheze lidnaspäi.

Koume žilod mülüdas lidnankundha Jemanželinskan ližaks. Lidnankundan pind — 64,34 km².

Eläjad

Vl 1939 lidnan ristitišt oli 11 100 eläjad. Vn 2010 Venäman rahvahanlugemižen mödhe lidnan eläjiden lugu oli 30 216 ristitud, lidnankundan — 31 136 ristitud. Kaikiš suremb lidnan ristitišt oli 36 tuhad eläjid vl 1967. Kaik 29 077 ristitud elihe lidnas i 29 921 ristitud kaikes lidnankundas vl 2017.

Rahvahad (2010): venälaižed — 87,9%, totarlaižed — 4,3%, ukrainalaižed — 2,6%, baškiralaižed — 1,2%, saksalaižed — 1,2%, toižed rahvahad — 2,8%.

Professionaližen opendusen aluzkund om Pervomaiskijan sauvondmaterialižtegimišton tehnikuman Jemanželinskan filial.

Edeline lidnankundan pämez' om Aleksandr Hrulev (keväz'ku 2005 — kül'mku 2020).

Galerei

• 
  Suren sodan memorialine kompleks (2010)
• 
  Lihanümbriradajan «Romkor»-kompanijan tulend vl 2010
• 
  Lidnan poliklinikan naižkonsul'tacijan tulend (2014)
• 
  Čomamahtoiden škol lapsiden täht Vägestusen skveras (2001)

Irdkosketused

• Lidnankundan oficialine sait (emanjelinsk.ru). (ven.)