Graivoron

<table class="infobox infobox- " style="" data-name="El6ndtaho" >

Graivoron (ven.: Гра́йворон) om Venäman röunanverine lidn Belgorodan agjan suvipäivlaskmas. Se om Graivoronan lidnümbrikon (edel vn 2018 sulakud — rajonan) administrativine keskuz.

Istorii

Eländpunktan aluz om pandud vl 1678 kozakoil kuti Graivoroni-slabad (ven.: слобода Грайвороны). Vl 1838 slabad sai makundan lidnan statusad. Vn 1848 lujan lämoipalon jäl'ghe udessaudihe lidnad oigedsaumaižen planan mödhe.

Graivoron šingotase elektromehanižen, savičun, parketlaudan i saguden tegimil.

Geografijan andmused

Lidn sijadase Vorskl-jogen hural randal (ven.: Ворскла, Dnepran hura ližajogi), 130 m ü.m.t. keskmäižel korktusel. Matkad Ukrainan röunhasai om seičeme kilometrad suvipäivlaskmha avtotedme, Belgorodhasai — 78 km päivnouzmha, se om Venäman lähembaine lidn.

Lugovk-žilo (ven.: село Луговка, 221 rist. vl 2016) mülüi lidnankundha Graivoronan ližaks. Lidnankundan pind oli 30,64 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 6 234 ristitud, lidnankundan — 6 444 ristitud, rajonan videndez. Kaikiš suremb lidnan ristitišt oli 8 900 eläjad vl 1926, Suren sodan jäl'ghe — 6 506 eläjad vl 2016. Vl 2017 lidnan ristitišt oli 6 404 eläjad.

Galerei

• 
  Lapsiden kirjišt ph. Ioasaf Belgorodalaižen časounänke (1998) tagamal vl 2011
• 
  Ph. Mikulain jumalanpert', vn 2011 nägu
• 
  20. voz'sadan augotišen torguindrived vl 2015
• 
  Lidnan keskškol (2011, ende prihaižiden progimnazii)
• 
  Nevondkundaline lidnanznam (1970-nded voded)

Irdkosketused

• Lidnan Territorialižen administracijan lehtpoled Graivoronan lidnümbrikon tobmuden aluzkundoiden oficialižel saital (graivoron.ru). (ven.)