Gagarin (Smolenskan agj)

<table class="infobox infobox- " style="" data-name="El6ndtaho" >

Sil sanal voib olda toižid znamoičendoid; miše nähta niid, tulgat tänna.

Gagarin (ven.: Гагарин; edel 23.04.1968 — Gžatsk) om Venäman lidn da lidnankund Smolenskan agjan pohjoižpäivnouzmas. Se om Gagarinan rajonan administrativine keskuz.

Istorii

Eländpunktan aluz om pandud vl 1703 kuti Gžatin valdmad (ven.: Гжатская пристань) Suren Petran käskön mödhe. Vl 1776 Gžatin slabad' sai lidnan statusad Gžatsk-nimenke. Suren sodan aigan lidn oli okkupiruidud (9. reduku 1941 — 6. keväz'ku 1943).

Udesnimitihe Jurii Gagarinan (1934−1968) kanzannimen mödhe, oli sündnu Gžatskan sündutamižkodihe. Lidn šingotase mašiništonsauvomižen edheotandoil (dizel'likutimed, pressad, patronad), sömtegimištol (lihafabrik, maidkonservad), mugažo šintegim pästab räzinan jändusišpäi, lämuztehnikan fabrik, mecan ümbriradmižen edheotand i omblendfabrik ratas.

Geografijan andmused

Lidn sijadase Gžat'-jogen molembil randoil (Volgan bassein), 194 m ü.m.t. keskmäižel korktusel. Matkad Moskvan agjhasai om 20 km päivnouzmha, Smolenskhasai om 205 km suvipäivlaskmha orhal vai 228 km «Belarus'»-avtotedme (M1) i 250 km raudtedme. Lähembaižed lidnad oma Väz'm 58 km suvipäivlaskmha orhal, 66 km avtol vai raudtel, Sičovk 54 km lodeheze orhal, 89 km avtotedme vai 142 km raudtedme, i Možaisk (Moskvan agj) 66 km päivnouzmha orhal, 73 km avtotedme vai raudtedme.

Trufani-žilo (ven.: Труфаны, ristitišt om tundmatoi) mülüb lidnankundha Gagarinan ližaks. Lidnankundan pind — 17,95 km².

Eläjad

Vn 2010 Venäman rahvahalugemižen mödhe lidnan eläjiden lugu oli 31 721 ristitud, rajonan kaks' koumandest. Kaikiš suremb lidnan ristitišt oli mugažo vozil 1996 i 2011 — 31 700 ristitud. Ortodoksižen hristanuskondan nell' pühäpertid om kaičenus lidnas.

Gagarinan äiprofil'ne kolledž om professionaližen opendusen aluzkundaks.

Tetabad sündnuded

• Nikolai Noskov (sünd. 1956) — Venäman pajatai da muzikankirjutai.

Irdkosketused

• Lidnan tobmuden aluzkundoiden oficialine sait (gagarinadmin.ru). (ven.)