Bergen

<table class="infobox infobox- " style="" data-name="El6ndtaho" >

Bergen (mugažo kirjutase norvegijan kelel, virktas [ˈbæ̀ɾɡn̩]) om lidn da municipalitet (kommun) Norvegijan suvipäivlaskmas. Se om valdkundan kahtenz' lidn eläjiden lugun mödhe, Vestland-agjan üks' kahtes administrativižes keskusespäi (edel 2020. vot oli Hordalann-agjan keskuz), toine om Hermansverk-külä.

Istorii

Eländpunktan aluz om pandud Olaf III-kunigahal vl 1070 norv.: Bjørgvin-nimitusenke (Björgvin). Lidn om pandud Pohjoižmeren Vogenan merikaran randan pol'sarel, mitte om kaitud saril merospäi. Norvegijan kunigahad i jepiskopad eliba Bergenhus-lidnuses 12. da 13. voz'sadal. Vll 1217−1299 Bergen oli keskaigaižen Norvegijan pälidnaks. Ganzan torgovanad ohjastiba lidnas 14.-18. voz'sadal.

Bergen šingotase järedal meriportal amussai, se om kaikiš suremb valdkundas (56 mln tonnoid jüguid, 9. sija Evropas, i 350 tuhad passažiroid vl 2009). Lidn om akvakul'turan i laivansauvomižen keskuz, kivivoinümbriradmižen i šel'fsamižen tehnologijan edheotandad ratas kundas. Valdkundan üläopendusen, turizman i finansoiden znamasine keskuz.

Geografijan andmused

Lidnan-municipalitetan rajonad

Lidn sijadase Pudde-fjordan randal, keskuz om 5 m ü.m.t. keskmäižel korktusel. Kundan kaikiš korktemb čokkoim om Gull'fjell'stoppen-mägi (987 m). Om äi reskveden järvid lidnankundan röunoiš.

Bergen jagase kahesaks nimitadud administrativižeks rajonaks (norv.: bydel). Nell' sildad ühtenzoittas lidnad lähižidenke kundoidenke. Matkad Oslo-pälidnhasai om 496 km päivnouzmha raudtedme vai avtotedme.

Eläjad

Vn 2010 rahvahanlugemižen mödhe lidnan eläjiden lugu oli 256 580 ristitud, vl 2000 — 229 496 ristitud. Kaikiš suremb ristitišt om nügüd'. Vl 2007 etnižed norvegijalaižed otiba 84,5% ristitištos, verazmalaiženke augotižlibundanke — 15,5%.

Transport

Avtobusad, trolleibusad, kiruhtramvaid (Bybanen-sistem) i funikulörad oma kundaližeks transportaks lidnas.

Rahvahidenkeskeine Bergen Flesland-lendimport (BGO, 6,3 mln passažiroid vl 2018) sijadase 18 km lidnan keskusespäi. Tehtas reisid Evropan äjihe lidnoihe, mugažo Norvegijadme, om äi sezončarterreisid Keskmeren lebutahoiže.

Irdkosketused

• Lidnan oficialine sait (bergen.kommune.no). (norv.)  (angl.)