Čoser Džefri

<table class="infobox infobox- " style="" data-name="Personalii" >

Džefri Čoser (mugažo Džeffri vai Gotfrid, angl.: Geoffrey Chaucer [ˈtʃɔːsər]; sünd. läz 1343. vot, London, Anglijan kunigahuz — kol. 25. reduku 1400, sigäna-žo, om mahapandud Vestminsteran abbatuses) oli anglijalaine runokirjutai, literaturižen anglijan kelen i angližen literaturan alusenpanii. Kirjuti ičeze sädusid anglijan kelel ezmäižeks latinan kelen sijas. Sädi prozad-ki ("The astrolab"-tedotraktat, kirjutused elos), tegi poemiden kändusid italijan i francijan kelišpäi.

Biografii

Čoseran tat torgui vinal, i hänen poig putui tanhale seičemetoštkümnevoččel kunigahan poigan akan pažaks. Ühtni vn 1359 sodamatkha Francijad vaste, putui plenha, i Eduard Koumanz'-kunigaz maksoi päzutamha händast, kändi ičeze kamerdineraks da azegenkandajaks.

Vll 1360−1367 Čoser openui Londonan juridižes üläškolas, tedoiži Amuižen Riman klassižid kirjutajid, tezi Francijan nügüd'aigaižiden runokirjutajiden sädusid. Opendusen jäl'ghe ajeli Italijha diplomataks i tegi tundmust Italijan runoištonke da torguindlidnoidenke.

Kanz

Vl 1366 Džefri i Filippa (de Roe neiččel, 1346−1387) vändiba sajad. Sündutihe kaks' last, Elizabet i Tomas Čoserad.

Sured poemad

• "Gercoganakan kirj" (angl.: Book of the Duchess, 1369)
• "Anelida i Arsit" (Anelida and Arcite, möhäližed 1370-nded voded)
• "Linduiden parlament" (Parlement of Foules, 1382)
• "Troil i Kressida" (Troylus and Chryseide, 1382, viž kirjad)
• "Hoštusen pert'" (The House of Fame, 1383−1384)
• "Legend ezikuvaližiš naižiš" (Legend of Good Women, 1388)
• "Kenterberrin sanutesed" (The Canterbury Tales, 1387−1400, 22 runosanutest i kaks' prozišt sanutest, jättud kesketi)

Irdkosketused

• Lehtpoled Džefri Čoseras Garvardan universitetan saital (sites.fas.harvard.edu). (angl.)