Ülätur

<table class="infobox infobox- " style="" data-name="El6ndtaho" >

Lidnan da sen ümbrišton nägu kaimdajaspäi edel 2006. vot

Ülätur (ven.: Ве́рхняя Тура́, tot.: Югары Түре) om Venäman lidn da lidnümbrik Sverdlovskan agjan päivlaskmas.

Istorii

Eländpunktan aluz om pandud vl 1737 kuti kaugedraudan valamižtegim i žilo senno Tur-jogen randal. Vl 1766 panihe Alaturan alust, i nimitaškanzihe žilod nügüdläižikš sijadusen mödhe lähemb joginiškannoks. Vn 1928 27. päiväl elokud kätihe radnikžiloks. Vspäi 1941 Ülätur om lidnan statusanke. Vhesai 1996 oli alištunu lähižen Kušv-lidnan tobmudele.

Ülätur šingotase mašiništonsauvomižen tegimel (raudten elektročepiden irdaližed katkaižimed).

Geografijan andmused

Lidn sijadase Tur-jogen molembil randoil (Obinjogen hurapol'ne bassein), 220 m ü.m.t. keskmäižel korktusel. Padosein sädab Üläturan vezivaradimen, ned oma lidnan suvipäivlaskmas. Matkad Jekaterinburghasai om 175 km suvhe orhal, 203 km avtotedme vai raudtedme. Lähembaižed lidnad oma Krasnoural'sk 8 km päivnouzmha orhal, avtol i raudtel, i Kušv 4 km suvhe-suvipäivlaskmha orhal, avtotedme vai raudtel. Kilometrine sarak tuleb lidnha «Alatagil — Serov»-avtotekeskustalpäi.

Ülätur om lidnümbrikon üks'jäine eländpunkt. Lidnümbrikon pind — 236,43 km².

Eläjad

Vn 2010 Venäman rahvahanlugemižen mödhe eläjiden lugu oli 9 461 ristitud. Kaikiš suremb lidnan ristitišt oli 16..17 tuhad eläjid vozil 1959−1970 (17 509 rist. vl 1959).

Rahvahad (2010, ozutadud rahvahudenke): venälaižed — 83,5%, totarlaižed — 14,4%, toižed rahvahad — 2,1%.

Ortodoksižen hristanuskondan kaks' pühäpertid oma olmas lidnas: ph. Aleksandr Nevalaižen päjumalanpert' (om saudud vll 1905−1908) i ph. Jurgii-vägestusenkandajan časoun'.

Üläturan mehanine tehnikum om professionaližen opendusen aluzkundaks.

Irdkosketused

• Üläturan lidnümbrikon Duman oficialine sait (duma-vt.ru). (ven.)
• Üläturan lidnümbrikon Administracijan oficialine internet-portal (v-tura.ru). (ven.)